సూరానేని హరిబాబు. తెలుగు బ్లాగు ప్రపంచంలో ఒక విషయంపై తన అభిప్రాయాన్ని చిచ్చర పిడుగులా వినిపించగలిగేవారిలో ఒకరు. తనకు తెలిసిన విషయంపై ఎంత పట్టుదలగా వాదించగలరో, తెలియనిదానిని అంగీకరిస్తూ నేర్చుకోవడానికి ప్రయత్నిస్తానంటారు. విషయాలను పరిశోధించి తన బ్లాగులో ఆర్టికల్స్ వ్రాయడం వల్లనూ, ఎదుటివారితో చర్చలకు సమాధానం చెప్పడానికి గానూ బ్లాగులోకంలోకి వచ్చాక అధ్యయనం డోసు పెరిగిందంటున్న ఆయన తెలుగు బ్లాగుల క్వాలిటీ పెరగాలంటే కంటెంట్ క్వాలిటీ పెరగాలంటున్నారు. పాపులారిటీ కోసం చీప్ ట్రిక్స్ ప్లే చేయడం సరి కాదంటున్నారు. బోధ గురువులతో పాటు బాధ గురువుల విమర్శల మాటలు పట్టించుకుంటే ఏమి వ్రాయకూడదో, ఎలా వ్రాయకూడదో తెలుస్తుందన్నారు. వాదన లేకుండా జ్ఞానం బయల్పడదని జ్ఞానం కోసం వాదన సాగర మధనం జరగాల్సిందేనంటున్న హరిబాబు గారు వాదన సందర్భంగా తన భాషపై వస్తున్న ఆరోపణలను గమనించి ఇకముందు తగ్గించుకోవడానికి ప్రయత్నిస్తానన్నారు. "హాస్యానికీ, వెక్కిరింతకీ తేడా తెలియని తింగరితనం" నాకు నచ్చదంటున్న ఆయన తనకు కామ్రేడ్ లెనిన్ రోల్ మోడల్ అంటున్నారు. ప్రస్తుత బ్లాగు లోకం తీరు, రాజకీయాలు , రామాయణం, సాహిత్యం...... వంటి వివిధ అంశాలపై, వ్యక్తిగత అంశాలపై తన అభిప్రాయాలను 'పల్లెప్రపంచం'కు వివరించారు. హరిబాబు గారిని ఇంటర్వ్యూ చేసేందుకు కొన్ని ప్రశ్నలు పంపిన శ్యామలీయం గారికి ధన్యవాదములు. శ్యామలీయం గారి ప్రశ్నలకు బ్రాకెట్లో ఆయన పేరును సూచించడం జరిగింది.

ప్ర : మీ పూర్తి పేరు ?
జ  'సూరానేని వెంకట సత్య ఉమామహేశ్వర మాధవ శోభనాచల హరిబాబు'.  అవాక్కయ్యారా?! మా అమ్మగారు అట్లా అంతమంది దేవుళ్ళ పేర్లు కలిపి పెడితే మా మామయ్యలు అటెండెన్సు పిలిచేటప్పుడు టీచర్లు తిట్టుకుంటారు,తర్వాత సర్టిఫికెట్లలో కూడా అంత ఖాళీ ఉండదు అని హడావిడి చేసి మొదటి ముక్కా ఆఖరి ముక్కా మాత్రం మిగిల్చారు!

తర్వాతెప్పుడో నాపేర్న పోష్టాఫీసులో దాచటానికి ఖాతా ఓపెన్ చేస్తూ ఆ పోష్టాఫీసు మనిషి అందర్నీ అడిగినట్టే పూర్తి పేరు చెప్పండంటే ఆవిడ అమాయకంగా ఇదంతా చెప్పింది - ఇన్నాళ్ళకి ఈ పూర్తిపేరు వాడే చాన్సు దొరికిందని సంబరమన్నా మిగలనివ్వకుండా మా నాన్నగారు తిట్లకి లంకిచుకున్నారు. 'ఈ మనిషీ ఆ మనిషీ ఒకరేనా? కాదా?' అని పొలిస్తే కాదని తెలిసి అందులో దాచిన డబ్బంతా యెవడికీ కాకుండా పోతుంది గదా అని. ఆఖరికి అంత ఘోరం యేమీ జరగదు లెండని ఆయన్ని శాంతపరిచి నేనే స్వయంగా ఆఫీసుకి వెళ్ళి విషయమంతా వివరించి ఆధారాలు చూపించి అక్కడ ఉరఫ్ అని ఇప్పటి నాపేరుని చేర్చాల్సి వచ్చింది:-)

ప్ర : తల్లిదండ్రుల వివరాలు? 
జ : నాకు నాలుగు తరాల ముందు అంటే ముత్తాత తరం అన్నమాట - సూరానేని చలపతి రావు గారు అనే పెద్దమనిషికి చాలాకాలం వరకూ పిల్లలు పుట్టలేదు. ఆయన స్నేహితుడు ముక్తేవి పాలంరాజు అనే పండితుడు బీజాక్షరాలు నిక్షేపించిన ఆంజనేయ దండకం రాసిచ్చి దాన్ని సాధన చేస్తే ఫలితం ఉంటుందని చెప్పారు. తర్వాత కొంతకాలానికి నలుగురు పిల్లలు పుట్టారు.అందులో ఒకాయన శాయన్న రావు గారు నాకు నాన్నకు నాన, ఒకామె చిన్నయ్యమ్మ, అమ్మకు అమ్మ! ఈమె గంగవెల్లి మాధవ రావు అనే కమ్యునిష్టు నాయకుణ్ణి పెళ్ళి చేసుకుని సూరానేని వైపు నుంచి గంగవెల్లికి వెళ్తే మా అమ్మ మళ్ళీ చలపతి రావు గారిని చేసుకుని గంగవెల్లి నుంచి సూరానేనికి వచ్చింది. మళ్ళీ నేను మా అమ్మకి ఆఖరి తమ్ముడైన చలపతి రావు గారమ్మాయిని చేసుకున్నాను - అంతా గందరగోళంగా వుంది నాకే. ఈ అటూ ఇటూ మారకాల తిప్పటాల పెళ్ళిళ్ళతో. ఇప్పటికి 'హరిబాబు ఒక చలపతి రావుకి కొడుకు. ఒక చలపతి రావుకి అల్లుడు.'

మనవాళ్ళు ఆడపిల్లల కైతే లక్ష్మీ దేవి, దుర్గాదేవి, శారదాదేవి పేర్లలో యేదో ఒకటి పెడతారు గాబట్టి సమస్య లేదు గానీ మగపిల్లాడికి తాతగారి పేరు పెడితే మిగతా వాళ్ళకి బాగానే ఉంటుంది గానీ తల్లికి మాత్రం పెద్ద సమస్య - అది మామగారి పేరు? దాంతో మా నాయనమ్మ మాత్రం వాళ్ళబ్బాయిని "కృష్ణమ్మ" అని పిలవడం, మా అమ్మమ్మ వాళ్ళబ్బాయిని "కృష్ణయ్య" అనే పేరుతో పిలిచి అందరికీ అదే అలవాటు చెయ్యడంతో తండ్రికీ, మామకీ ముద్దుపేర్లు గూడా ఒకటే అయినాయి:-)

అంటే మా ఇంట్లో మూడు తరాల పాటు మేనరికాలు అటూ ఇటూ తిరిగాయన్న మాట, వాస్తవానికి నేను చదివిన సైన్సులో వీటిని అతిగా కొనసాగించకూదదని ఉన్నా చిన్న వయస్సులోనే బలంగా ముద్రపడిపోవడం వయస్సుతో పాటూ తనే నాకు భార్యగా కావాలన్న కోరిక కూడా పెరగడంవల్ల ముందుకే వెళ్ళాను. కానీ మా అమ్మాయి పుట్టిన రెండో రోజున ఫ్యాను గాలికి మరీ చలిగా అనిపించో యేమో ఒక రోజంతా చెయ్యి వొణికించి తెగ కంగారు పెట్టేసింది మేనరికం ముప్పు గుర్తొచ్చి:-) 

మాకెందుకీ సుత్తంతా, పాయింటు చెప్తే చాలు అనే వారికోసం :- తండ్రి పేరు: సూరానేని చలపతి రావు , తల్లి పేరు సూరానేని దుర్గయ్యమ్మ

ప్ర : మీరు పుట్టిన ఊరు వివరాలు?
 ఇప్పటికీ వెయ్యి ఓట్లు మించని వూరు నర్సింగపాలెం. కృష్ణా జిల్లా మచిలీపట్టణం పార్లమెంటు పరిధిలోని నూజివీడు అసెంబ్లీ నియోజక వర్గ పరిధిలో ఉంది మావూరు.  పాతకాలం సంస్థానాల రోజుల్లో తేలప్రోలు సంస్థానంలో ఉండేది. ఇప్పుడు ఆగిరిపల్లి మండలంలో ఉంది. మా తాతగారు కూడా అప్పట్లో ఈ తేలప్రోలు సంస్థానంలో ఉద్యోగం కానీ, పరపతి కానీ ఉండేది కాబోలు క్యామెడీగా మాట్లాడే మా మేనమామ ఒకరు మీదంతా గుర్రాల్నమ్ముకున్న సంపాదనరా! అని జోకులేస్తూ ఉంటే సరదాగా నవ్వుకునే వాణ్ణి. ఒక పెద్దమనిషి జమీందారు గార్ని కలిసి మా అబ్బాయి ఆడుకోవటానికి గుర్రం కావాలని యేదుస్తున్నాడండి అంటే యెందుకని అడక్కుండా ఇచ్చెయ్యటం, ఓ ఆర్నెల్ల తర్వాత ఆ గుర్రం పారిపోయిందండీ మా అబ్బాయి యేడుస్తున్నాడు అంటే మళ్ళీ యెందుకనడక్కుండా ఇచ్చెయ్యటం - అట్లా ఉండేది అప్పట్లో కొందరి ఆర్జన పధ్ధతి! ఆ పెద్దమనిషి మా తాతగారూ ఆ చిన్న్నిబాబు మా నాన్నగారూ కాబోలు? ఈ వివరం సరిగ్గా తెలీదు, యెందుకంటే ఈ మధ్యనే మా అమ్మగారిని ఆ విషయం అడిగితే మీ తాతయ్యకి సొంతంగా పెద్ద వ్యవసాయమే ఉండేది. ఆయనెప్పుడూ ఉద్యోగం చెయ్యలేదు అనేసింది.

ప్ర  : మీ పుట్టిన తేది  ?
జ : 1962 ఏప్రిల్ 21

ప్ర : మీ విద్యార్హతలు?
జ : M.Sc Zoology (Physiology)

ప్ర : మీ విద్యాభ్యాసం వివరాలు?
జ : అయిదవ తరగతి వరకూ మావూళ్ళోనే చదివాను. మొదట్లో కింది తరగతి పంతులు మహా క్రూరుడు కావటంతో చదువు మొదలవటం మహా భయంకరమైన వాతావరణంలో మొదలయినా ఆ తరగతి దాటాక మాత్రం యమా ఫాస్టుగా చదివా! యెంత ఫాస్టుగా అంటే హైస్కూలు కెళ్ళాక మరీ తొందరగా చదివి వొచ్చేసరికి కుర్రాడు ఎలిజిబుల్ అవుతాడా? లేదా? అని టెక్నికల్ డిటైల్స్ సరిచూసుకోవలసి వచ్చింది. అయిదో తరగతి వరకు 'గాంగ్ లీడర్' హోదా ఉండేది - సర్పంచ్ గారబ్బాయిని కదా :)

తర్వాత క్లాసుల్లో ఆ హుషారు తగ్గినా మొత్తమ్మీద క్లాసులో హరిబాబు అనేవాడు ఉన్నాడని చాలామందికి తెలిసేటంత పాపులారిటీ మాత్రమే కుదిరింది! మూడేళ్ళు కావటంతో డిగ్రీలో మరోసారి హ్యాపీలైఫ్ గడిపా. అప్పట్లో మా ప్రైవేటు మాస్టారు, "మీ పరీక్ష పత్రాలు దిద్దుతుంటే పరమ చిరాగ్గా ఉంటుంది పేరాగ్రాఫులకి పేరాగ్రాఫులే ఎగిరిపోతాయి మరీ అంత బట్టీ వెయ్యాలా? అదే, హరిబాబు పేపర్లు దిద్దుతుంటే రిలీఫుగా ఉంటుంది - రాసిందాంట్లో కంటిన్యుటీ ఉంటుంది" అని మొహమ్మీదనే మెచ్చుకునేసరికి బయటికొచ్చి నేనంటే ఇష్టం గాబట్టి సరదగానే కుళ్ళి చచ్చారు మావాళ్ళంతా:-) ఇక్కడే ఒక extempore seminar ఇచ్చి అదే సారు నుంచి "haribabu is really genius,let us claps for him" అనే మెప్పందుకుని క్లాప్స్ కొట్టించుకున్నా!

ప్ర  : మీ వివాహం - కుటుంబం వివరాలు?
జ  : భార్య పేరు మాధవి. ఉపాధ్యాయురాలు. కూతురు సౌదామిని. ఇంజనీరింగ్ కంప్యూటర్ సైన్స్ టాపిక్ తీసుకుని పూర్తిచేసి కొంతకాలం పుణేలో ఉద్యోగం చేసి ఇపుడు అమెరికాలో M.S చేస్తుంది. నాలాగా కాకుండా లెక్కల్లో 95% కి తగ్గకుండా మార్కులు తెచ్చుకోవడం, నా వల్లనే జరిగినా నాకూ హేపీయే. తను తన చదువే కాకుండా పక్కవాళ్లకి కూడా సహాయం చేస్తుంటుంది. అది మరీ గ్రేట్! ఇప్పుడు అక్కడా ఫస్ట్ సెమ్ పూర్తయ్యి హాలిడేస్ వేస్ట్ చేయకుండా వాళ్ల టీచింగ్ స్టాఫ్ ట్రైనింగ్ అస్సైన్‍మెంట్ అప్పజెప్పారు.

ప్ర  : మీ ప్రస్తుత నివాసం ?
: 2001 నుంచి ఇప్పటి వరకూ చెన్నై నగరం మనిషిగా నన్ను నిలబెట్టి ఉంచుతున్నది. ఇంకో రెండేళ్ళు ఒడిదుడుకులు లేకుండా గడిస్తే చాలు తిరిగి స్వరాష్ట్రానికి వచ్చేస్తా. ఇన్నేళ్ళు ఉన్నా తమిళం ఒక్క ముక్క మాట్లాడలేను. మా వాళ్ళు మొదటి ఆర్నెల్లలోనే తమిళకుట్టిలై పోయారు! అప్పుడప్పుడూ నా యెదురుగానే నామీద తమిళంలో జోకులేసుకుంటుంటారు, అయినా తమిళం నేర్చుకోవాలనే కసి పుట్టదు యెందుకనో?!

ప్ర : (శ్యామలీయం) అంతర్జాల విహారం కాక మీకు వేరే హాబీలున్నాయా? 
జ : పుస్తకాలు నమలడం(?), సంగీతం వినడం. మొదట్లో కేవలం మెలోడీ మాత్రమే వినేవాణ్ణి గానీ, మా అమ్మాయి పుణ్యమా అని స్పీడ్ మ్యూజిక్ గూడా బాగుండటం మొదలైంది. అందరూ స్టాంపులు కలెక్ట్ చేసినట్టు నేను ఫొటోలు కలెక్ట్ చేశాను. చార్లెస్ శోభరాజ్ దగ్గిర్నుంచి బిర్సాముండా వరకూ పత్రికల్లో పడిన ఫొటోలతో ఒక 200 పేజీల నోటుబుక్కు నింపేశాను!

ప్ర  : మీ అభిమాన రచయిత  ?
జ : విశ్వనాధ సత్యనారాయణ

'రామాయణ కల్పవృక్షం'  వ్రాసినందుకు మాత్రం కాదు. నేను ఆ పుస్తకం చదవలేదు, సొంతంగా చదవలేను కూడా!

పాతని పొగుడుతూ కొత్తని తిడుతూ చాదస్తంగా ఉంటాడని చాలామంది అనుకుంటారు గానీ సాహిత్య రచనలో ఈయన చూపించిన వైవిధ్యాన్ని ప్రపంచ సాహిత్యంలో మరెవరూ చూపించలేదు. "పాషాణ పాక ప్రభూ!" అని పిలిపించుకునే పరమ గ్రాంధికమూ వ్రాశాడు, అసలు గ్రాంధికం చాయలే లేని కిన్నెరసాని పాటలూ వ్రాశాడు!

ఇవ్వాళ్టి డాన్ బ్రౌన్ తను వ్రాసే నవలలకి యెంతో పరిశోధన చేసి వ్రాస్తాడని మెచ్చుకుంటారు బాగానే ఉంది, కానీ ఆనాటి కాలంలోనే పురాణ వైర గ్రంధమాలలో అనుకుంటాను ఒక పాత్ర ద్వారా గుడుంబా తయారు చేసే విధానం గురించి వివరంగా వర్ణిస్తారు.

పులిమ్రుగ్గు కధలో మనిషి పులిగా మారడం అనేది అభూతకల్పన ఆయినా చిత్రమైన లాజిక్ ఉపయోగించి సమర్ధించిన తీరు చూస్తే కనీసం చదివేటప్పుడు నిజంగానే అట్లా జరిగే అవకాశం ఉందేమోనని భ్రమ పడతాం!

కధానాయకుడు ఆ రహస్యాన్ని కనిపెట్టడం షెర్లాక్ హోంస్ కధల్లో కనిపించే విధంగా చాలా సహజంగా ఉంటుంది. సీరియల్ నవలా విధానంలో వ్రాసిన తొలి తెలుగు రచయితా ఈయనే. 

ప్ర :  మీకు నచ్చే రచనలు?
జ : చదవటానికి యే విధమయిన షరతులూ లేవు. అన్నీ చదువుతాను - బోరు కొట్టకుండా వుంటే చాలు.

ప్ర   : మీ అభిమాన నాయకుడు  ?
జ : కామ్రేడ్ లెనిన్ - నేను ఈ మధ్యన కమ్యునిజాన్ని విమర్శించుతూ కొన్ని పోష్టులు వేసినందువల్ల ఈ విషయం కొందరికి వింతగా అనిపించినా నేను చెయ్యగలిగింది లేదు. అయితే, లెనిన్ పూర్తిగా ప్రాక్టికల్ మనిషి కావడమూ, సిధ్ధాంతంలోని సంక్లిష్టత కన్నా ఆచరణలో వైరుధ్యాలు వస్తే వాటిని సులువుగా అధిగమించి కమ్యునిష్టు సిధ్ధాంతాన్ని మూఢనమ్మ్మకం లాగ కాకుండా యెట్లా మార్పులు చేసుకోవాలో చూపించాడు గాబట్టి లోపాలు లేని - ఒకవేళ ఉన్నా తక్కువగా(?) ఉన్న ఆదర్శవంతమైన జీవితం గడిపిన నాయకుడిగా నాకు నచ్చాడు!

ప్ర    : మీ అభిమాన నటుడు  ?
జ : యస్.వి.రంగారావు - నటనలోని నవరసాల్లో అన్నిటినీ అత్యద్భుతంగా పండించగలిగిన 'ఒకే ఒక విశ్వనటుడు!' యన్.టి.ఆర్ 'దాన-వీర-శూర-కర్ణ'లో అంతంత పొడుగు డైలాగుల్ని గుక్కతిప్పుకోకుండా చెప్పి మెప్పించినా అందులో పట్టి పట్టి చెప్పిన ఎఫెక్టు కన్నా "బానిసలు, బానిసల కింత అహంభావమా?" అని మనం గిరీశం టైపు బొట్లేరు తెంగ్లీషుని యెంత ఫాస్టుగా మాట్లాడతామో అంత ఫాస్టుగా చెప్పడమే 'గ్రేట్' అనిపిస్తుంది!

ప్ర   :  మీకు నచ్చిన సినిమా  ?
 : "ప్రేమనగర్" - అప్పటిదాకా నాకు మాధవి మీద ఉన్న అభిమానం పేరు "ప్రేమ" అని తెలిసింది ఆ సినిమా చూశాకనే. ఈ సినిమాకి సంబంధించిన ఒక వింత అనుభవం చెప్తే అనుకోకుండా కూడా హరిబాబు లైఫులో ఇట్టాంటి క్యామిడీలు పేల్తాయా అని మీకూ నవ్వొస్తుంది. మా నూజివీడు నగరంలో అమెరికన్ హాస్పటల్ అని పిల్చుకునే ఒక హాస్పటల్ ఇన్‍పేషెంట్లుగా యెప్పుడూ మా బంధువుల్లో యెవరో ఒకరు ఉండటం తటస్థించేది. మోతుబరులు కదా, హాస్పటల్లో యేదో ఒక మూల సర్దుకోరు. దానికి యెదురుగానే కొడాలి కొండయ్య సత్రంలో అద్దెలు కట్టుకుని కుటుంబం మొత్తం దిగేవాళ్ళు. యెట్లాగూ ఆ సంరంభం ఉంది గాబట్టి ఆ సత్రంలో దిగినవాళ్ళకి చుట్టాల తాకిడీ యెక్కువే. అట్లా చుట్టపు చూపుగా పెద్దవాళ్లతో కలిసి వెళ్ళి వరసగా రెండు రోజుల్లో చూసిన నాలుగో సినిమా సెకండు షోగా ఈ సినిమా పడింది. ఇంక చూసుకోండి! ఇంటికొచ్చాక తెల్లారి గోడ వైపు తేరిపార చూస్తే చాలు, ఆ సినిమా తెరమీద కనపడినట్టు కనపడడం మొదలయింది:-) మొదట దడుచుకున్నాను గానీ ఒక టిక్కెట్టుకి రెండు సార్లు చూడడం  అనే ఫీలింగు వచ్చేసి కులుక్కుంటూ చూసేశా! ఒకసారి పూర్తిగా చూసేశాక ఇక మళ్ళీ ఆ భ్రమ అంతటితో పోయింది.

ప్ర : మీకు ఇష్టమైన ఆహారం?
జ : తిండికి సంబంధించి ప్రత్యేక ఇష్టాలు యేమీలేవు. ఇదివరలో బెండకాయ ఇగురు ఇష్టంగా తినేవాణ్ణి.

ప్ర : 'జీవితంలో అన్నింటికంటే ముఖ్యమైనదేది' అంటే ఏమి చెప్తారు?
జ :  నీతి! - నీతి!! - నీతి!!! - శుక్రనీతి సారం కొన్ని సర్దుబాట్లు చేసుకొమ్మంటుంది - ప్రాణ మాన విత్త భంగము లందు పలికి బొంక వచ్చు నంటూ! కానీ, అది మొత్తం జీవితంలో ఒకటి, రెండుసార్లు  కన్నా ఎక్కువగా రిపీట్ కాగూడదని నా అభిప్రాయం. 

ప్ర : మీకు ఇతరులలో నచ్చేవి ఏవి? నచ్చనివి ఏవి?
జ : సరదాగా ఉండాలి. ఒకసారి చస్తే మళ్ళీ పుడతామనే గ్యారెంటీ లేదు! యెంత గింజుకున్నా  "జీనా యహా , మర్నా యహా, ఇస్కే సివా కోయీ నహీ" అనేది నిజం.  ఈ మాత్రానికే యేడుస్తూ బతకడం దేనికి? ప్రతివారూ గొప్ప సాహసాలు చెయ్యనక్కర లేదు. (ఎవరికో  రిటార్టు ఇస్తున్నానని అనుకోవద్దు. ఒక రకమైన ఫీలింగ్ చూడండి నా మాటల్లో) నవ్వుతూ..... నవ్విస్తూ...... పది రోజులు బతికినా చాలు!

నాకు నచ్చనిది కూడా మొహం మాడ్చుకుని ఉండటమే - జగదేకవీరుడి కధలో "త్రిషా కృష్ణన్..." ప్రస్తావనల్ని ఒకరు మరో విధంగా మెలిక తిప్పి వాడినప్పుడు నిజంగా కంగారు పడ్డాను. హాస్యం పరిధి దాటి ఆడవాళ్ళని కించపరిచే విధంగా ఏమయినా రాశానా!? అని మరోసారి సరిచూసుకున్నాక గానీ, స్థిమితంగా ఉండలేకపోయాను. "హాస్యానికీ, వెక్కిరింతకీ తేడా తెలియని తింగరితనం" నాకు నచ్చదు

ప్ర : మీలో మీకు నచ్చేవి ఏవి? నచ్చనవి ఏవి?
జ : "పాయింటు పడితే పంబ రేగిపోయేటట్టు" వాదించి నెగ్గగలగడం నచ్చుతుంది, ఒక్కొక్కసారి కంట్రోల్ తప్పి మూర్ఖంగా కనిపించటం నచ్చదు.

ప్ర :  మీ రోల్ మోడల్ ఎవరు? 
జ : నా రోల్ మోడల్ కూడా లెనినే!

ప్ర :  మీకు నచ్చే వృత్తి? 
జ : ఉపాధ్యాయ వృత్తి - రెండు అనుభవాలతో ఆ ప్రొఫెషన్ దూరమై పోయింది.

మొదట్లో ప్రయత్నించాను. 'జాబు రావడం గ్యారెంటీ' అనుకున్న చోట, డెమోకి తీసుకున్న సబ్జెక్టు ఎదురు తన్నేసి తర్వాత నీరసమొచ్చి అటుకేసి వెళ్ళలేదు. గుంటూరు ఏసీ కాలేజిలో నాకు బాగా ఇరగదీస్తానని నమ్మకమున్న "ధియరీ ఆఫ్ ఎవల్యూషన్" అను భయంకరమైన సబ్జెక్టు తీసుకున్నా. డెమో ఇరగదీశాను. అంతా అయిపోయాక, సెలెక్టర్లలో ఒకాయన "మీరు నాస్తికులా?" అనడిగేసరికి సిన్సియారిటీ యెక్కువయి అవునన్నా! (లోపల్లోపల "చచ్చిందిరా నీ గొర్రె హరిగా?!" అని తిట్టుకుంటూ!) అసలే హిందువుల కన్నా క్రీస్టియన్లకి నాస్తికులంటే చచ్చే భయం మరి! 

ఇంకోసారి "బేసిక్ లైఫ్ ఈక్వేషన్" గురించి అదరగొట్టాను. నేను డెమో పూర్తి చేసి బైటికి రాగానే లాంగ్ బెల్ కొట్టేసరికి బయటి కొచ్చిన కుర్రాళ్ళలో ఒకరిద్దరు బాగుందని మెచ్చుకున్నారు గూడా. ఇక్కడ ఓవర్ క్వాలిఫికేషన్ ప్రాబ్లెం - వాళ్ళు పేమెంటు ఓవర్ అవుతందనుకున్నారు గాబోలు?  అక్కడా జాబ్ రాలేదు.

ప్ర :  మీ బ్లాగు వివరాలు  ?
జ : బ్లాగు పేరు - "హరికాలం".  వ్యాఖ్యానం లాంటి తలకట్టు - “ఉన్నవి మూడు కాలాలే - వెచ్చని కాలం, చల్లని కాలం, జల్లుల కాలం. అన్ని కాలాల్లోనూ పచ్చగా ఉండేది హరి కాలమే!”

ప్ర :  మీరు బ్లాగులోకంలోకి ఎలా ప్రవేశించారు?
జ : మొదటి కామెంటు "తెలంగాణా గుండెఘోష" దగ్గిర వేశాను. తర్వాత యెక్కువగా "ఆంధ్రా ఆకాశరామన్న" దగ్గిర వేసేవాణ్ణి. ఒకసారి వనజ వనమాలి గారి సైటులో వేరే యెవరో ఆమెకి బ్లాగు ఓపెన్ చెయ్యటం గురించి క్లూ ఇచ్చారని చెప్తే నేను వనజ గార్ని అడిగాను. మీ కామెంట్ పబ్లిష్ అయినప్పుడు మీ పేరు లింకులా వస్తుంది గదా, దాని మీద క్లిక్ చేస్తే సరాసరి మీ అడ్మిన్ అకౌంటు లోకి వెళ్తారు, అక్కణ్ణీంచి మొదలు పెట్టండి అని సలహా ఇచ్చారు. ఆ క్లూ పట్టుకుని నేనూ సొంతంగా కొంచెం నేర్చుకుని మొదలు పెట్టాను. మొదటి పోష్టు “శ్రీకారం చుట్టుకుంది బ్లాగు పుస్తకం”. అప్పటివరకు నేను అప్పుడప్పుడూ వ్రాసిన పద్యాలని ఒక పది బ్లాగులో పోష్టులుగా ఉంచాను.

ప్ర :  బ్లాగరుగా మీ అనుభవాలు?
జ : ఈ ప్రశ్న నాకు బ్లాగరుగా మీరు పోట్లాడిన పోట్లాటలు అన్నట్టు అర్ధమైంది:-)

శ్రీకాంత్ చారి గారు అంత భీకరంగా పోట్లాడుతున్నా, ఒక సన్నివేశంలో మాత్రం నాకు సపోర్టుగా వచ్చి నాకు నచ్చేశారు. వేణువు బ్లాగరు "ఇదండీ మహాభారతం" గురించిన చర్చలో టైపోస్ వల్ల కొంత ఇబ్బంది పడినా ఆయన నేను చెప్పిన దాన్ని సమర్ధించే విషయాన్నే ఇంగ్లీషు మూలం రెఫరెన్సు ఇవ్వడం నాకు చాలా చాలా నచ్చింది.

నా వైపు నుంచి నేను వాదించే విషయం తప్పని తెలిస్తే సరిదిద్దుకోవటానికి సిధ్ధంగానే ఉన్నాను. అయినా నేనెక్కడా సొంత ప్రతిపాదనలు చేసినట్టు నాకు గుర్తు లేదు. సత్యానికి నిర్వచనంగా 'ఏక సూత్రత' అనేది అందరూ ఒప్పుకున్న విషయం గాబట్టి వైరుధ్యాలని ప్రశ్నిచటమే యెక్కువగా చేసినట్టు నాకు గుర్తు?!

బ్లాగరుగా నా అనుభవాలు ఖచ్చితంగా నేను మానసికంగా ఏదిగేటందుకు దోహదపడినాయి. మొదట్లో ఉన్న మూర్ఖత్వం ఇప్పుడు లేదు. పోస్టులు రాయడానికీ, జవాబులు చెప్పడానికీ పరిశోధన డోసు పెరిగింది!

ప్ర :  బ్లాగు ప్రపంచంలో ఎదురైన ఆటంకాలు, ఇబ్బంది అనిపించిన సందర్భాలు?
జ : చిన్నప్పట్నించీ నాది 'బైరాగి' మనస్తత్వమే - నాకున్న ఒకే ఒక రాగం 'మాధవి'. కాబట్టి బ్లాగుల్లో నేను ఇబ్బంది పడిందేమీ లేదు.

ప్ర : (శ్యామలీయం) మీరు సుదీర్ఘమైన టపాలూ వ్యాఖ్యలూ వ్రాస్తుంటారు. సమాచారం కోసం పరిశోధన చేసి మరీ వ్రాస్తున్నట్లు తెలుస్తున్నది ఈ మధ్యనే చదరంగక్రీడపై ఒక సాఫ్ట్-వేర్ కూడా వ్రాసి మీ ఫేస్‍బుక్‍లో అనుసంధానం చేసారు. మీకు ఉద్యోగ బాధ్యతలూ ఉన్నట్లు చదివినట్లు గుర్తు. మీరు ఇన్ని కార్యక్రమాలకు సమయం ఎలా సర్దుబాటు చేయగలుగుతున్నారు?
జ : నా ఉద్యోగం ప్రొగ్రామింగ్ సంబంధమైనది. మామూలుగా ఇవాళ సాఫ్ట్వేర్ ఫీల్డులో గొప్ప క్రియేటివ్ పనులేమీ జరగటం లేదు. వ్యాపారులైన క్లయింట్లకి వెబ్సైటులు తయారు చెయ్యటం తప్ప పెద్దగా చాలేంజస్ యేమీ లేవు. వాళ్ళ గురించి చెప్పుకునే ఒక "ABOUT US" పేజి, వాళ్ళ వస్తువుల్ని చూపించే ఒక "GALLERY/PORTFOLIO" పేజి, వాళ్లని కాంటాక్ట్ చెయ్యటానికి పనికొచ్చే "CONTACT US" పేజి తప్ప వెరయిటీయే ఉండదు. అదే కంటెంటుని టెంప్లేట్లు మార్చి మార్చి కొత్తగా చూపించి తంటాలు పడుతుంటాం. ఇందులో ఆ డిజైనింగు తంటాలు అన్నీ పూర్తయినాక గానీ వర్కు నా వరకూ రాదు. నా పని కూడా ఇంటరాక్టివిటీ యేర్పాటు చేసి క్లయింట్ పేజిని సర్వర్ డాటా కనెక్ట్ చెయ్యటమే. పెద్దగా పని ఉండదు. కానీ, కీలకమైనది కాబట్టి ఇంపార్టెన్సు ఎక్కువ. - ఇంకొక రెండు మూడేళ్ళు గడిస్తే చాలు!

ప్ర : (శ్యామలీయం) మీ పరిశోధనాత్మకవ్యాసాలను టపాలుగా వేయటమే కాదు. వాటిని అవసరమైనట్లు సంస్కరించి, క్రోడీకరించి ఈ-పుస్తకాలుగా వేస్తే బాగుంటుంది కదా? ఆ విషయంలో మీ ఆలోచన ఏమిటి?
జ : నిజమే. పోష్టుల్ని ప్రశంసించే కామెంట్లని చూస్తుంటే నాకూ పుస్తక రూపంలో ఉంటే ఎక్కువమంది చదువుతారని అనిపిస్తున్నది. వ్యాఖ్యాతలలో కొందరు ఆ సలహా ఇచ్చారు. అవకాశం కుదిరితే తప్పకుండా ఆలోచిస్తాను.

ప్ర : మీ బ్లాగులో మీకు నచ్చిన పోస్టులు?
జ :  క్రింది 9 పోష్టులు :-

1. తొలి ముద్దు - తొలి పీల్పుడు లాంటి మొదటి పోష్టు :-  శ్రీకారం చుట్టుకుంది బ్లాగు పుస్తకం

2. మొదటి ప్రశంస రుచి చూపించిన :- యే గాడిద వెనక యెక్కినా యేముంది

3. చారిత్రక విశ్లేషణలో తొలి అడుగు :- కాంగ్రెసుని ద్వేషించటం నా జన్మ హక్కు?! (బాల గంగాధర తిలక్)

4. నా శైలి వ్యంగ్యానికి తొలి ఆనవాలు :-  చిత్రమయిన గొప్పవాళ్ళు?!

5. హఠాత్తుగా విరుచుకు పడిన కవితాత్మక వచనపు గుయెర్నికా :- రాజు లంతా ఒక రకంగానే వుంటారా?నిజామునీ, కృష్ణదేవరాయల్నీ ఒకే గాటన కట్టెయ్యొచ్చా?

6. పూర్తిగా హాస్యానికి కట్టుబడిన చక్కిలిగింతల ఖజానా :- యేందీ తెలంగాణా కాంగ్రెసోళ్ళ చిలుకుడు పండగ?నాకేందో కెలకనీకి హుషారు గున్నది!

7. రాజ కపూర్ సినీ జీబిత సౌరభాల పరిచయం :-  చార్లీ చాప్లిన్ ట్రాంప్ - రాజ్ కపూర్ ఆవారా


8. సంస్కృత సాహిత్యానికి యెత్తిన జయకేతనం :- యెవరీ కాళిదాసు?యేమిటితని గొప్ప!

9. భారతీయ కులవ్యవస్థ గురించిన పరిశోధనాత్మక విశ్లేషణ :- యెవరు నేను?యెవరు మీరు!అధికారం ముందా?అభివృధ్ధి ముందా?ఈ హరిబాబు యేమి చెప్తాడు?!


ప్ర : కొత్త బ్లాగర్లకు మీరిచ్చే సలహాలు?
జ : గురువులు రెండు రకాలు: 1) 'బోధ' గురువులు 2) 'బాధ' గురువులు. మనల్ని విమర్శిస్తూ విరుచుకుపడే కామెంట్లని 'బాధ గురువులు'గా తీసుకుని అందులోనుంచి కూడా ఏమి రాయకూడదు? ఎలా రాయకూడదు? అని నేర్చుకుంటే తప్పకుండా ఒకరోజుకి మీ పోష్టులు అందరూ మెచ్చుకునేవిగా తయారవుతాయి!

ప్ర :  తెలుగు బ్లాగుల అభివృద్ధికి మీరిచ్చే సూచనలు ఏమిటి?
జ : తెలుగు బ్లాగుల అభివృధ్ది అనేది చాలా పెద్ద మాట! అది జరగాలంటే చాలా గొడవలున్నాయి! - బ్లాగుల సంఖ్య పెరాగాల్సిన పని ఉందా? యేమో! కొత్తగా చేరినందువల్లనే కదా? నేనెవరో మీకు తెలిసింది, ఇక చాలని నేనెట్లా అనగలను? - 'పాపులారిటీ' అనేది ఒకటి పెంచవచ్చు. 'పాపులారిటీ' పెంచటానికి చీప్ ట్రిక్కులు వేసినా ఉపయోగం ఉండదు. కంటెంటు పట్ల జాగ్రత్తగ ఉండి మంచి టపాలు వ్రాయడం తప్ప మరో దారి లేదు. - కొత్తగా ఏమీ ఉధ్ధరించకపోయినా సమాజంలో ఇప్పుడున్న ఈ కాస్త శాంతినయినా భగ్నం చెయ్యకూడదనే మినిమం రెస్పాన్సిబిలిటీ ఉండాలి. 

ప్ర  : బ్లాగుల వల్ల ఉపయోగమేమిటని మీ అభిప్రాయం?
జ : ఏదో ఒకటి వ్రాస్తూ పోతే భాష మెరుగు పడటం మొదటి ఉపయోగం. చెత్త పోష్టుల్ని చదివిన జనం తిట్లు భరించలేకనన్నా ఎంతో కొంత నేర్చుకోవడం అనేది పెద్ద ఉపయోగం.

ప్ర  : ఇతరుల బ్లాగులలో మీకు నచ్చిన పోస్టులు ఏమిటి? 
జ  :
1. శ్యామలీయం మాస్టారి "ఒక వూరి కధ" మధ్యలో ఆపవద్దని రిక్వెస్ట్ చేసినా మధ్యలో ఆపేసారు. పూర్తి చేస్తే బాగుంటుంది!

2. తేటగీతి వారి "బృందగానాలో సంబురాలు". అందులో ఆయన పేర్లని మార్చి పుట్టించిన హాస్యానికీ, కంటెంటులోని హెల్దీ కామెడీకి కరుడుగట్టిన తెవాదులు కూడా కడుపుబ్బా నవ్వుకుని ఉంటారేమో?!

3. శ్రీకాంత్ చారి 47వ రోనిన్ గురించి రాసిన పోష్టు. అ సినిమా నేను టీవీలో సగం నించే చూడడంతో అర్ధం కాలేదు, ఆ పోష్టు చదివాక లింకు కలిసి సినిమాలో ఉన్న కంటెంటు అర్ధమయింది. కులం అనేది ప్రపంచమంతటా మనిషికి తన యెంటిటీకి సంబంధించిన విషయంగా ఇష్టమూ అవుతుండటం, అదే ఇష్టం తను మరొకరి చేత అణచబడటానికీ కారణం అవుతుండటం బాగా ఎలివేట్ అయింది. సరిగ్గా యేనుగుల వీరాస్వామయ్య గారు తన కాశీయాత్ర చరిత్రలో ఇలాంటిదే ఒక పరిశీలన చేశారు. ముందు మందు ఆ పుస్తకం నుంచి కొన్ని భాగాల్ని పోష్టులుగా వేస్తాను.

ప్ర : (శ్యామలీయం) బ్లాగుల్లో చర్చల జోరు నడుస్తోంది. కొన్ని బ్లాగులు చర్చా వేదికలైతే, మరికొన్ని బ్లాగుల్ని వ్యాఖ్యాతలు చర్చావేదికలుగా మార్చేసుకొని హోరెత్తిస్తున్నారు. నిజానికి ఈ చర్చల నుండి ఎవరైనా ఏమన్నా నేర్చుకుంటున్నారంటారని మీరు నమ్ముతున్నారా? 
జ : నేర్చుకోవచ్చునని అనిపించే అప్పటిదాకా ఉంచిన కామెంటు మోడరేషను ఎత్తేసి నా బ్లాగుని అనామకంగా కూడా వ్యాఖ్యానించటానికి వీలుగా ఓపెన్ చేశాను!

ప్ర : (శ్యామలీయం) మీరు తరచుగా చదివే తెలుగు బ్లాగులు ఏవి? అస్సలు పట్టించుకోని తెలుగుబ్లాగులు ఏవి? వీలైతే సకారణంగా వివరిస్తారా?
జ : నేను నా అడ్మిన్ రీడర్స్ లిష్టులోని బ్లాగుల పేర్లని పైన ఇచ్చాను. నేను అస్సలు పట్టించుకోని బ్లాగులు ఉన్నాయా? నాకు తెలీదు!!

ప్ర : (శ్యామలీయం) తెలుగు బ్లాగులకు మంచి ప్రచారం ఎందుకు రావటం లేదు? అందుకు బ్లాగర్లు ఎలా కృషి చేయాలని మీ అభిప్రాయం? 
జ : అసలు తెలుగు భాషకే పెద్ద దిక్కు లేదు, బ్లాగుల కెలా ఉంటుంది? తొలి భాషా ప్రయుక్త రాష్త్రం అయినా తెలుగుని అధికార భాషగా యెందుకు చెయ్యలేకపోయారు? టీవీల్లో కృష్ణ లాంటివాళ్ళు తెలుగు భాషని బతికించడం గురించి మాట్లాడుతుంటే నాకు అసహ్యం వేసింది, అంత దుస్థితికి కారణం ఏమిటి? తమ పిల్లలకి తెలుగు నేర్పటానికి ఫలానా కృష్ణ అనే సినిమా నటుడు అలా చెప్పాలా?

ఏమి దరిద్రం ఇది! తెలుగువాళ్ళు తెలుగులో మాట్లాడుకోవటానికి  కూడా మరొకరు మనకి వింజామరలు విసరాలా? బహుమతులు ఇవ్వాలా?

కాబట్టి ముందు భాషకి ప్రాధాన్యత ఇస్తే ఆ భాష మీద ఆధారపడిన బ్లాగులూ హుషారుగా ఉంటాయి! నేను శ్రధ్ధగా చదివేది గొల్లపూడి మారుతిరావు గారి కౌముది వ్యాసాలు. మంచి తెలుగు రాయడం ఎట్లా? అని సందేహం ఉన్న ప్రతివాళ్ళూ చదవాల్సిన వ్యాసాలు అవి!

కంటెంటులో క్వాలిటీ పెంచడం వల్లనే బ్లాగుల్ని ఆకర్షణీయంగా చెయ్యాలి. మరోదారి లేదు! చదివించే లక్షణం ఉంటే వాటికి ప్రచారం తీసుకురావడం తేలిక!

ప్ర : మీరు దేవుడిని విశ్వసిస్తారా?
జ : ఇప్పుడు మీరెవరూ నమ్మరు గానీ, మొదట్లో అరిభీకరమైన నాస్తికుణ్ణి. మా బంగారంతో పెళ్ళి విషయంలో సమస్యలు రావడం కొంతా, అప్పట్లో వాజపేయి, అద్వానీ లాంటి మంచి నాయకులని చూసి మెత్తబడి కొంతా, భక్తుడిగా మారిపోయాను. అప్పటి నాస్తికత్వం యెంత అరిభీకరమో ఇప్పటి భక్తి గూడా అరిభీకరంగానే ఉంది!

ప్ర : ఆధ్యాత్మికతకు మీరిచ్చే నిర్వచనం? 
జ : హేతువుకి పూర్తిగా తిలోదకాలిచ్చి మూఢనమ్మకాలకి పోకుండా ఉంటే చాలు - మితమైన మతం హితమే!

ప్ర  : మతం పై మీ అభిప్రాయం? 
జ : లౌకికం అంటే సమాజం దృష్టిలో ఆ మనిషి యెట్లా ఉండాలి? అని నిర్ణయించేది. మతం అంటే సమాజం తనతో యెట్లా ప్రవర్తించాలి? అని మనిషి అనుకుంటాడో దానికి సంబందించిన విషయం. తప్పకుండా ఒకదాని ప్రభావం మరొకదాని మీద ఉంటుంది. దేవుణ్ణి నమ్మడమే మతం కాదు గదా? నాస్తికత్వం, కమ్యునిష్టు తరహా ఆలోచనా విధానం అన్నీ ఆధ్యాత్మికత కిందకే వస్తాయని నా అభిప్రాయం.

ప్ర :   సనాతన ధర్మం పై మీ అభిప్రాయం? 
జ : సనాతన ధర్మం గురించి నాకు యెక్కువగా తెలియదు - ముఖ్యంగా చారిత్రక విషయాలు. నాకు ఆచరణలో పనికి వచ్చేవీ, నన్ను తప్పులు చెయ్యకుండా కాపాడేవీ అయిన కొన్ని మంచి మాటల్ని ఒక అయిదారింటిని ఫాలో అవుతున్నాను. అంతే!

ఇప్పుడు కొత్తగా తెలిసిన సమాచారం ప్రకారం ఇంగ్లీషు వాళ్ళు చెప్పిన  "చరిత్ర పూర్వ యుగం" అనే అబద్ధం ఈ మధ్యనే బద్దలైపోయింది. అయినా ఇప్పటి వరకూ మనకి తెలియని చరిత్ర అనాలి గానీ చరిత్ర పూర్వ యుగం ఏమిటి? వాళ్ళ బొంద! ఇప్పటి దాకా రికార్డు చెయ్యబడిన చరిత్ర ప్రకారం హరప్పా మహంజదారో శిధిలాల్ని బేస్ చేసుకుని చెప్పిన తొలి వైదిక యుగం అత్యంత ప్రాచీనమైనది. కానీ అందులో ఉన్న సారాన్ని చూసినా అది శిశువు వేసే తొలి నడకల్లాగా ఉండకుండా పూర్తి రూపంతో ఉండటం వల్ల ఎప్పుడు పుట్టిందనే అంచనా తెలియదు కాబట్టి 'సనాతన దర్మం' అన్నారు.

ప్ర: మీరు డిప్రెషన్ కు గురైనప్పుడు రీచార్జ్ కావడానికేమి చేస్తారు?
జ: మంచి పుస్తకాలు చదువుతాను.పాత సినిమా పాటలు, ఘంటసాల పాటలు - మరీ బెంగగా అనిపిస్తే "కలిమి మిగలదు" పాట వింటాను. సేకరించే హాబీ లేదు గానీ, జోకుల్ని చదువుతాను. అది యెందుకు నవ్విస్తున్నదని పరిశోధిస్తాను  - అదో తిక్క నాకు.

ప్ర : నేటి యువతకు మీరిచ్చే సలహాలు ఏమిటి? 
జ : హుషారుగా ఉండండి. కుర్రాళ్ళు ఏడుపు మొహాలతో ఉంటే నాకే కాదు ఎవరికయినా చిరాకే? ఫాస్టుగా వుండటం ఇప్పటి కాలానికి చాలా అవసరం. కానీ, ఏ పని చేసినా ఈ పని ఎందుకు చెయ్యాలి? అని ప్రశ్న వేసుకుని జవాబు దొరికాకనే చెయ్యండి!

ప్ర  : ఇతరులను నొప్పించకుండా మాట్లాడాలంటే ఏమి చేయాలి? 
జ : ఇది మాత్రం నన్ను అడిగి ప్రయోజనం లేదు:-) "బుధ్ధి చెప్పువాడు గుద్దితే నేమయా చాకి కోకలుదికి చీకాకు పడజేయడా?" అన్న వేమన్న మాట ఇచ్చిన సపోర్టుతో ఎదుటివాళ్ళు నొచ్చుకున్నా సరే, అని చెలరేగిపోతున్నాను నేను! అయినా పాజిటివ్ స్పిరిట్ కోసం ఒక మాట చెప్తాను - "ఇతరులు నీకేది చేస్తే కష్టం కలుగుతుందో ఇతరులకి అది నువ్వు చెయ్యకు" అన్న సూక్తి పాటిస్తే చాలు.  

ప్ర  : మీకు తెలంగాణా వాదులు అంటే గిట్టదా? ఆంధ్రా పక్షపాతంతో తెలంగాణా వారిని దుర్భాషలాడుతూ పోష్టులు వ్రాస్తున్నారన్న ఆరోపణకు మీ సమాధానం?
జ  :తెలంగాణ వాళ్ళు ఆంధ్రావాళ్ళని దుర్భాష లాడుతూ పోష్టులు వేస్తున్నప్పుడు ఇటువైపు నుంచి  ఆ పనే చేస్తే తప్పేమిటి? ఇంకా గట్టిగా చెప్పాలంటే తెలంగాణ సంస్కృతి గురించి తెలుసుకోవాలన్న కుతూహలం ఎక్కువగానే ఉంది. తెలంగాణలో చెరువుల పూడికలు తియ్యడం గురించి నేనొక ప్రశ్న వేశాను 'ప్రజ'లోనే! ముందూ, వెనకా ప్రస్తావనలు లేకపోవడం వల్ల అప్పటిదాకా ఉన్న వాతావరణం వల్ల అది 'వెటకారం' అనిపించి ఉండవచ్చు, కానీ ప్రశ్న మాత్రం తెలుసుకోవాలనే జిజ్ఞాస తోనే వేశాను!

కవిత్వం రాయాలంటే ముందు చదవాలి, చదివిన దాంట్లో మంచి కనబడితే మెచ్చుకోవాలి కదా! ఈ మధ్య కాలంలో నాకు బాగా నచ్చిన కవిత దెంచనాల శ్రీనివాస్ గారు రాసిన "భస్మ సారంగి". అది కవిగారు తన తలిదండ్రుల పరంగా తెలంగాణ ప్రజలు కొన్ని తరాల పాలు పడిన కస్టాల గురించి రాసుకున్న ఆత్మచరిత్రాత్మమైన కావ్యం! మళ్ళీ మళ్ళీ చదువుతుండటం వల్ల మూడొంతులు కంఠస్థమైపోయింది!

విడిపోవటాన్ని వ్యతిరేకించ లేదు. దాని కోసం చెప్పిన అబధ్ధాల్ని వ్యతిరేకిస్తున్నాను. పైన చెప్పిన చెరువుల పూడిక గురించే చూడండి - వర్షాలు కురిసి చెరువులు నిండిన ఒక తెలంగాణ గ్రామంలో ఆ చెరువుల్ని ఎండగట్టే సాహసం ఏ ఆంధ్రావాడైనా చెయ్యగలడా? వాడు రాజకీయవాది అయితే వాడికి పాపులారిటీ ఎలా వస్తుంది? ఓట్లు ఎలా పడతాయి? అది కాక వ్యాపారి అయితే ప్రజలు సుభిక్షంగా ఉండి కొనుగోలు శక్తి పెరిగితేనే గదా తన వ్యాపారం బాగుండేది? - వాడెందుకు చేస్తాడు? మరి కేసీఆర్ ఆంధ్రోళ్లు మన చెరువుల్ని ఎండగట్టెసిన్రు అనంగానే దాన్ని నమ్మేసేవాళ్ళని గట్టిగా మందలిస్తే తప్పేంటి?

ప్ర : 'హరి బాబు మంచివాడే. "ఒక్కోసారి అనవసరంగా నోరు పారేసుకుంటాడు......." ఇన్ని తెలిసిన హరిబాబు కు భాష విషయంలో తెలిసీ ఎందుకు కంట్రోల్ లో ఉండరు' అంటే ఏమి చెపుతారు?
జ అది 'నోరుపారేసుకోవడం' లాంటి బలహీనత ఎంతమాత్రం కాదని నేననుకుంటున్నాను. ప్రతి మనిషీ తను ఎట్లా ఉండాలి? ఎలా మాట్లాడాలి? అని తనకి తనే పెట్టుకున్న కొన్ని గైడ్‍లైన్స్ ప్రకారమే ప్రవర్తిస్తాడు. పేరు ప్రఖ్యాతులలో తేడాలు ఉండటం వల్ల అతనితో పోల్చుకోవడం సుపీరియారిటీ కింద లెక్క వెయ్యకుండా అర్ధం చేసుకోగలిగితే - కాళోజీ అనే తెలంగాణ కవి తెలుగువాళ్ళకి ఉన్న ఇతర భాషల పట్ల వ్యామోహాన్ని విమర్శిస్తూ "చావవెందుకురా ఆంధ్రుడా!" అనేశాడు. చావు ప్రస్తావన తీసుకురావడమంటే చావుతిట్లు తిట్టడమే గదా?! ఆ తీవ్రత యెందు కొచ్చింది?

ఒక పాయింటుని యెంత గట్టిగా చెప్పాలి? అనే లెఖ్కలో ఉండే తేడాల వల్ల మీకు అది నోటిదురుసు అనిపించవచ్చు. తెలిసే కావాలని ఆ మాటల్ని వాడుతున్నందువల్ల నాకు పశ్చాత్తాపం లాంటివి కూడా లేవు, రావు! అయినా పదే పదే విమర్శలు వస్తున్నాయి గనక ఇకముందు తగ్గించడానికి ప్రయత్నిస్తాను!

ఒక పాత సంగతి చెప్తాను. విశాఖ రేడియో కేంద్రం నుంచి యువవాణి కార్యక్రమం ద్వారా చాలా కాలం క్రితమే ఒక ఉపన్యాసం ఇచ్చాను "శాంతికోసం సమరమే సాధనం" అనే టైటిలుతో. ఇప్పటి నా పోష్టుల్లో మీరు చదువుతున్న స్టయిల్లోనే పూర్తి గంభీరంగా ఉండకుండా కొంచెం వినోదాన్ని మిక్సప్ చేసి చెప్పాను. అందులో నేను చెప్పిన పాయింటు ఇది: ఒక మేధావి శాంతి అనేది రెండు యుద్ధాల మద్యన వచ్చే ఇంట్రవల్ అని అన్నాడు, అని సరదా టోనులో మొదలుపెట్టి చివరాఖరికి వచ్చేసరికి శాంతిని భగ్నం చేసేవాళ్ళ మీద యుధ్ధం చేసి గెలవడం ద్వారానే శాంతిని స్థాపించగలం తప్ప శాంతిని గురించి సుభాషితాలు చెప్తూ శాంతి యజ్ఞాలు చేస్తూ ఉంటే శాంతి దానంతటది ఉనికిలోకి రాదు అని నిరూపించాను. ఇప్పుడు నేను చేస్తున్నదీ అదే!

ప్ర : (శ్యామలీయం) బ్లాగు చర్చలు రణరంగాల్ని తలపించుతున్నాయి. ఆ వీరాగ్రేసరుల్లో మీరొకరు. కానీ, ఈ యుధ్ధస్థాయి వ్యవహారం వలన తెలుగు బ్లాగులకు మంచి జరుగుతున్నదా? పోనీ దీర్ఘకాలంలో మంచి జరిగేందుకు ఇవి తోడ్పడుతున్నాయా?
జ : విశాఖ రేడియో స్టేషనులో నా ప్రసంగం గురించి పైన చెప్పానుగా! అమృతం కావాలంటే క్షీరసాగర మధనం జరగాల్సిందే హాలాహలాన్ని భరించాల్సిందే!

ప్ర  : రాముడిని విమర్శిస్తేనే మీకు కోపమా? రామాయణంలో లోపాలే లేవా?
జ  : రాముడిలో లోపాలు లేకేమి?వాల్మీకి రచనలోనూ ఉన్నాయి! కానీ ఇప్పటి వాతావరణంలో నా అంతట నేను చెప్పను! మీకో హింట్ ఇస్తాను. నేను హిందూ దర్మ ప్రహేళికలు అనే పేరుతో మొతం 5 భాగాలు వేశాను - నాలుగో భాగం యెవరయినా చదివారా? చదవి చూడండి! ఆ భాగంలోని విమర్శలు మీకెవరికీ తల్లకిందులుగా తపస్సు చేసినా తట్టవు?! వాటినీ పేరు పేరునా ప్రస్తావించి 5వ భాగంలో జవాబులు చెప్పాను. 'రామాయణం' చదవకుండా అసలు అక్కడ ఉన్నది యేమిటి? అది నిజంగా లోపమా? కాదా? అని స్వయంగా తెలుసుకోకుండా విమర్శించడాన్ని మాత్రమే నేను వ్యతిరేకిస్తున్నాను, అది నేను ఎక్కడ దాన్ని గురించి ప్రస్తావించినా ముందో వెనకో మధ్యలోనో చెప్తూనే ఉన్నాను కదా! తనకి తెలియని దాని తెలిసినట్టు పోజులు కొట్టేవాళ్ళని ఎవరయినా ఆఖరికి మీరయినా సరే యేమంటారు - 'డాంబికం' అని కాదా?!

ప్ర  : రామాయణం నిజంగా జరిగిందని భావిస్తున్నారా?
జ : మొన్నీ మధ్య వరకూ అది కల్పితమనే అనుకున్నాను. కానీ హిందూ ధర్మ ప్రహేళికలు 5వ భాగంలో ప్రస్తావించినట్టు చారిత్రకంగా కూడా రాముడి ఆస్తిత్వానికి సంబంధించిన కొన్ని సాక్ష్యాలు బయటపడినాయి! వైజ్ఞానిక పరిశోధనల్లో కూడా కొన్ని సార్లు మొదట్లో గట్టి ఆధారాలుగా కనిపించినవి కూడా తర్వాత దశల్లో వీగిపోవడం జరుగుతున్నది కాబట్టి పూర్తిగా నిర్ధారణగా  తెలిసే వరకూ మనం గట్టిగా జరిగిందని చెప్పలేము!

ప్ర : విడిపోయాక ఆంధ్రప్రదేశ్ అభివృద్ధి ఎలా ఉంది?
జ : అభివృధ్ధి సంగతెలా ఉన్నా మమ్మల్ని దోచుకుని బాగుపడ్డారనే నింద ఉండదు! తమిళులతో విడిపోయేటప్పుడూ, తెలంగాణులతో విడిపోయేటప్పుడూ ఒకే పరిస్థితి! మనది అనుకుని అంతకాలం పెనవేసుకున్న నగరం మనది కాదు అని తెలియడం! అయినా సరే అప్పుడూ, ఇప్పుడూ కూడా చెప్పలేనంత ధీమా! దేన్ని చూసుకుని? అబివృధ్ధికి మూలమేమిటి? అనుబంధాల్ని తెంచుకోవడంలో బాధ వున్నా యేడుస్తూ కూర్చోవడానికి కూడా తీరిక లేకుండా కాలం తొందర పెడుతున్నది! అభివృధ్ధికి అవకాశాలు చాలా ఉన్నాయి, ఇన్నాళ్ళూ ఒకే నగరం చుట్టూ తిరిగిన వాళ్ళ కంటికి ఇవ్వాళ పది జిల్లాలు కనబడుతున్నాయి. ఆ విచక్షణ నుంచే సరైన దారి కనిపిస్తుంది.

ప్ర : ఎ.పి కి 'ప్రత్యేకహోదా' బి.జె.పి వారు ఇస్తారన్న నమ్మకం మీకున్నదా?
జ : రాజధానికి కేంద్ర సాయమన్నారు గానీ, మామూలుగా కట్ట్టే పాలనాపరమైన వసతులకి సాయం చేస్తారు గానీ ప్రపంచం పట్టనంత విశాలమైన రాజధాని అని మనం ప్లానేసి చూపిస్తే దానికీ సాయం చేస్తారా? చట్టంలో నిక్కచ్చిగా లేకుండా నోటిమాటగా చెప్పిన 'ప్రత్యేక హోదా' అసలు చట్టంలోనే యే రాష్ట్రానికీ ప్రత్యేక హోదా ఇచ్చేది లేదని చెప్పటం తోనే ఆశలు అడుగంటిపోయినాయి..కానీ సాంకేతికపరమైన ట్యాక్స్ హాలిడే లాంటివైనా సానుకూలం అవుతాయా? అనేవి చూడాలి!

ప్ర : పట్టిసీమ ప్రాజెక్ట్ కమీషన్ల కోసమే నంటున్నారు.... మీ అభిప్రాయం?
జ : 'మిషన్ కాకతీయ' కూడా 'కమిషన్ కాకతీయ' అయిపోయిందంటున్నారు. అవినీతి లేనిదెక్కడ? దాని గురించి మాటిమాటికీ చెప్ప్పడం కాదు గానీ ఒక విస్తృతమైన అర్ధంతో నిర్వచనం రాసుకున్నా నా పర్సనల్ నోటుబుక్కులో!ఆర్ధికంగా పరుగులు పెడుతూ యెదిగే ప్రతి సమాజంలోనూ అవినీతి యెంతో కొంత ఉంటుంది. అక్కడ తమాషా యేంటంటే పరిగెడుతున్నప్పుడు అవినీతి యే స్థాయిలో ఉన్నా, నెప్పి తెలియదు పరుగు ఆగినప్పుదు మాత్రమే అవినీతి 1% ఉన్నా భయపెడుతుంది!

విభజన వల్ల ఆంధ్రావాళ్ళ బుట్టలో పడిన అతిపెద్ద కానుక పోలవరం జాతీయ స్థాయిలో అడ్డంకుల్ని తొలగించుకుని ఇప్పటికైనా పూర్తవుతుందనే ఆశలు రేకెత్తించటం! కానీ మొండివాడు రాజుకన్నా బలవంతుడన్న లెఖ్ఖ ప్రకారం అక్కడ తెలంగాణకి ఒక మొండివాడే రాజయ్యాడు, తను అడ్డం తిరిగితే? పోలవరం పూర్తి రూపం సంతరించుకోవాలంటే తెలంగాణవైపు నుంచి సహకారం తప్పనిసరి కాదా? అదీగాక, పోలవరం ఒక్కటి పూర్తయితే ఇక భవిష్యత్తులో నీటి పారుదల ప్రాజెక్టుల అవసరమే ఉండదా?

ఇలాంటి సాంకేతిక పరమైన కారణలే పట్టిసీమని ముందుకు తీసుకొచ్చినాయని నా అభిప్రాయం. అంతకన్నా నీటి పారుదల అనే సాంకేతికపరమైన విషయాలు నాకు పెద్దగా తెలియవు కాబట్టి మిగతా విషయాల్ని నేను ప్రస్తావించ లేను.

ప్ర : ఎ.పి తెలంగాణా ప్రభుత్వాల లేదా బాబు-కె.సి.ఆర్ ల గొడవలని ఆంధ్రా తెలంగాణా గొడవలుగా మార్చాలని చూడడం సరయినదేనా?
జ : పనిగట్టుకుని ప్రభుత్వాల గొడవల్ని, బాబు-కె.సి.ఆర్ ల  గొడవల్ని ఆంధ్రా-తెలంగాణా గొడవలుగా మార్చాల్సిన పని లేదు! వాళ్ళు ఆయా రాష్ట్రాలకు ముఖ్యమంత్రులు. వాళ్ళ గొడవల వల్ల ఆ రెండు రాష్ట్రాల ప్రజలూ తమ ప్రమేయం లేకపోయినా ఫలితాన్ని అనుభవించాల్సి ఉంటుంది. అందుకనే ఇక్కడ చాణక్యుడూ అక్కడ మాకియవెల్లీ రాజు, ప్రభువు లేదా నాయకుడు అనే వ్యక్తి ఎలా ఉండాలి? అని కొన్ని సూచనలు చేశారు. ఋజువర్తనుడు, సాధుస్వభావి, ఇంద్రియ నిగ్రహం కలిగి ఉండటం, దూరదృష్టితో ఆలోచించి నిర్ణయాలు తీసుకోవటం - ఇలా కొన్ని అంశాలు ఉన్నాయి. అవి కేవలం సూచనలు అనుకుంటే కొట్టిపారెయ్యటం చాలా ఈజీ! కానీ ఆ విషయాల్ని చెప్పినవాళ్లు తాము చూసిన అనుభవసారం నుంచి ఇవి మేలు చేస్తాయి అని చెప్పారు.

ఆ గొడవలేవీ కేసేఅర్ - బాబు తమ సొంత ఆస్తుల పంపకాల గురించి పోట్లాడుకోవటం లేదు గాబట్టి సహజంగానే రెండు రాష్ట్రాల మధ్యనా ఉద్రిక్తతల్ని పెంచినాయి. నాకు 300 కోట్ల ప్లాను గురించి ఈ మధ్యన తెలిసిన కొత్త నిజాల వల్ల ఇద్దరిదీ తప్పేనని చెప్పగలను! కానీ ఒక టి.డి.పి సభ్యుడు "వ్యక్తిగతంగా నా వ్యాపారాల్ని టర్గెట్ చేస్తున్నాడు" అని చెప్పుకోవడం, పార్టీ అతనికి ఆర్దిక సహాయం చెయ్యటం కల్పితమా? కాదుగా! "మేము చేస్తే వ్యభిచారం - మీరు చేస్తే సంసారమా?" అని ఎదుటివాళ్లని నిలదీయడం వీరత్వమే కానీ, తమ మాట తమకే తగుల్తుందేమోననే ఆలోచన కూడా లేకపోతే యెట్లా?

ప్ర : ఎ.పికి ప్రత్యేక హోదాకై పోరాడకుండా ఎం.పి లు వ్యాపారం చేసుకుంటున్నారన్న పవన్ కళ్యాణ్ ఆరోపణలతో ఏకీభవిస్తారా?
జ : నూటికి నూరుశాతం ఏకీభవిస్తాను! మొదటి నుంచీ ఆంధ్రా ప్రయోజనాల పట్ల ఆంధ్ర నాయకులు నిర్లక్ష్యంగా వ్యవహరించటానికి కారణం అదేనని నేను కూడా అంటూనే ఉన్నాను. ఇంతకాలం తర్వాత ఇప్పుడు 'ప్రత్యేక హోదా సాధన సమితి' ఏర్పాటు చేశారు చూడండి!

ప్ర  : రాష్ట్ర విభజన తరువాత తెలుగు రాష్త్రాలలో ఏ రాష్ట్ర పాలన బాగుంది?
జ : ఓవర్ ఎక్స్పెక్టేషనుతో ఉన్నవాళ్ళకి నిరాశగానే ఉంటుంది. అంతకు ముందు ఉన్న రాజ్యాంగ చట్రమే! అంతకు ముందున్న పెట్టుబడిదారీ విధానమే. కాకపోతే నాయకులకి చేసి చూపించాల్సిన అవసరం మెడమీద కత్తిలాగ ఉంది కాబట్టి కొత్తల్లో కొన్ని ఒడిదుదుకులు ఎదురైనా రెండు రాష్ట్రాల పరిస్థితీ సమైక్య రాష్ట్రంగా ఉన్నప్పటి కన్నా మెరుగ్గానే ఉంటుంది!  'ఉంటుంది' అని ఎందుకు అంటున్నాను అంటే, పనులు ఇప్పుడే మొదలైనాయి, ఇవి ఫలితాన్ని చూపించాలంటే టైము పడుతుంది! కేసీఆర్ " నాలుగేళ్ళ తర్వాతనే నేనేం చేశానో చూడండి. చేశాము అని మీకు నమ్మకం కలిగితేనే మిమ్మల్నిఓట్లడుగుతాము అంటున్నాడు " ఆయనగారి మాటలు నమ్మేదెవరు? కానీ, ఈ చెరువుల పూడికల దగ్గిర్నుంచీ హరితహారం వరకూ దేన్ని అంచానా వెయ్యాలన్నా నాలుగేళ్ళు ఆగాల్సిందే. బాబు పరిస్థితీ అంతే - అక్కడ కూడా అంచనా కోసం ఆగాల్సిందే!

ప్ర  : మీ లక్ష్యం ఏమిటి?
జ : ప్రత్యక్ష రాజకీయాల్లోకి వెళ్ళాలి?! కంగారు పడకండి. పదవులు, అధికారం లాంటివాటిని ఎంజాయ్ చెయ్యడం కోసం కాదు. రాజకీయాలు ప్రజల ఆకాంక్షల్ని నెరవేర్చడంలో ఎందుకు ఫెయిలవుతున్నాయి? ఫ్రేం వర్కులో ఉన్న లోపమా? ఫ్రేంవర్కుని ఉపయోగించుకోలేకపోవడమా? దగ్గిర్నుంచి చూస్తే గానీ వాస్తవం తెలియదు. వాస్తవంగా సమస్య ఏమిటో తెలిస్తే గానీ పరిష్కారం సాధ్యపడదు!

ప్ర  : ఇతర బ్లాగులలో మీకు నచ్చినవి ఏవి?
జ : చాలా ఉన్నాయి - ఎకో గణేష్, పద్మార్పిత, తెలంగాణ అసాంజి, ఆంధ్రామృతం ఇష్టపది, ఎందరో మహానుభావులు, ఏది నిజం?,  కధామంజరి, కష్టేఫలి,  కృష్ణవేణీతీరం, గుండెఘోష, ఘంటసాల, చాకిరేవు, తేటగీతి, ధర్మస్థలం, నవ్వితే నవ్వండి, పనిలేక, మాలతీమాధవం, రమ్యంగాకుటీరాన(?), వనజవనమాలి(*), వరూధిని, శ్యామలీయం - ఇవన్నీ నా అడ్మిన్ ఖాతాలో లింకులుగా ఉన్నవాటిలో కొన్ని మాత్రమే!

ప్ర : సోషల్ మీడియాలో బ్లాగులు ,ఫేస్ బుక్ వంటి వాటిలో భావప్రసారానికి ఏ వేదిక బాగుంటుంది?
జ: బ్లాగులే బెస్టు! నేను ముఖ పుస్తకం ఎప్పుడో తప్ప తెరవను. పోష్టులు వేయడం, కామెంట్లు చూసుకోవడం, కామెంట్లలో ఎవరయినా ప్రశ్నలు అడిగితే జవాబులు చెప్పడం - ఇక్కడున్న ఇంటరాక్టివిటీ మిగతా చోట ఉండదు. మన అభిప్రాయాలు తప్పయితే సరిచేసుకునే ఫ్లెక్సిబిలిటీ ఇక్కడ ఉన్నంతగా మిగతా వాటిలో లేదు. ఆ మీడియాలో మనం ఏదన్నా పొరపాటున అనాలని అనకపోయినా పొరపాటు మాట జారితే బుక్కయిపోయి మన పరువంతా డ్యామేజి అయిపోవడమే తప్ప పరువుగా బయటపడే చాన్సు లేదు!

ప్ర : (శ్యామలీయం) తెలుగు బ్లాగులోకంలో వ్యక్తిగత విమర్శలు హెచ్చుగా కనిపిస్తున్నాయి. వాటిని ఎవరికి వారు స్వీయనియంత్రణ ద్వారా అదుపు చేసుకుంటే తెలుగుబ్లాగులు మరింత ఆహ్లాదకరంగా ఉంటాయన్న అభిప్రాయంతో ఏకీభవిస్తారా?
జ : ఒకప్పుడు ఆంధ్రా ఆకాశరామన్న బ్లాగులో చూసిన భీభత్సాన్ని గమనించే మొదట్లో కామెంటు మోడరేషను పెట్టాను. అప్పటితో పోలిస్తే ఇప్పుడు తగ్గింది ఆ ఆవేశం. ఈ క్యాటగిరీలో నేను కూడా ఉన్నాను. అది నాకూ తెలుసు. వాదనలో ఒకానొక సమయంలో మనం ఎంతో ముఖ్యమైన పాయింట్ అనుకున్నదాన్ని అవతలివాళ్ళు పట్టించుకోనప్పుడు అవతలి వ్యక్తి మీద కోపం రావడం సహజం. ఒకానొకప్పుడు చట్టసభల్లో ప్రకాశం , వావిలాల, తెన్నేటి లాంటి ఉద్దండులు కూడా అదుపు తప్పిన వారే, మనమెంత? సమర్ధించుకోవడం కాదు. వాదనకి దిగడంలోనే గెలవాలనే పంతం ఉంటుంది. కానీ,  నేనొక్కణ్ణే మరీ దూకుడుగా ఉంటున్నానా? అనిపిస్తున్నది,ఆలోచించాల్సిందే!

ప్ర : (శ్యామలీయం) బ్లాగర్ల మధ్య వ్యక్తిగత పరిచయాలుండటం ద్వారా అపోహలు తొలగించుకోవటం సులభం కావచ్చును. అందువల్ల బ్లాగు వ్యాఖ్యల్లో శబ్దకాలుష్యం  తగ్గుతుందని అశించవచ్చును. మీరు ఏకీభస్తారా?
జ : బ్లాగర్ల మధ్యన వ్యక్తిగత పరిచయాలు ఉండటాన్ని నేను వ్యతిరేకించను గానీ దానివల్ల గొడవలు తగ్గుతాయా?పాయింటులో తేడా వచ్చినప్పుడు క్లోస్ ఫ్రెండ్సు కూడా పోట్లాడుకుంటూనే ఉంటున్నారుగా?

ప్ర  : నేటి మీడియాలో రావలసిన మార్పులు ఏమిటి?
జ : మీడియా అంటే మీ భావం పత్రికలు,టెలివిజన్ చానెల్సు అని కదా! నా దృష్టిలో మీడియాకీ అవసరమైన దానికన్నా యెక్కువ స్వేచ్చయే ఉంది! ఇంకా మీడియా స్వేచ్చ అనవసరం.పైన మీడియాలో బాధ్యతారాహిత్యం చాలా చాలా చాలా యెక్కువగా ఉంది! నేనిది తెలంగాణలో కేసీఆర్ అణిచేస్తున్న ఆంధ్రజ్యోతి గురించో మరో సంస్థ గురించో ప్రత్యేకంగా చెప్పడం లేదు. రివర్స్ ఓపెన్ హార్టులో యన్.టి.ఆర్ చెవిపోగులు మార్చడాన్ని గురించి ప్రత్యేకంగా మాట్లాడుతుంటే నాకు చిర్రెత్తుకొచ్చింది! విధాన పరంగా ఏమైనా తప్పులు చేస్తే విమర్శించిన అది ఒక పధ్ధతి! అప్పుడు యన్.టి.ఆర్ అనే వ్యక్తిని పదవిలో నుంచి దించటం అనేది మీడియా తన శక్తిని రుజువు చేసుకోవటానికి చేసిన ప్రయోగం - అందులో సఫలమవడం చాలా గర్వాన్ని పెంచింది! జాతీయ మీడియా కూడా ఇట్లాగే ఉంది. పరిష్కారం లేదు, యెందుకంటే అధికారంలో ఉన్నవాళ్ళకి ఈ తరహా మీడియా సాయం చాలా అవసరం గనక  వీళ్ళని వాళ్ళూ నిరోధించరు. ఒకనాటి నిస్వార్ధపరులైన జర్నలిష్తులు "వార్త పవిత్రం - వ్యాఖ్య నీ ఇష్టం" అన్నారు, కానీ ఇవ్వాళ ఆ వ్యాఖల్లోనే అసలు రాజకీయమంతా నింపుతున్నారు - ఇపుడు "వార్త నీ ఇష్టం - వ్యాఖ్య మాత్రం పవిత్రం" అని చెప్పాలి కాబోలు ?!

ప్ర  : ప్రస్తుత రాజకీయాలపై మీ అభిప్రాయం?
జ : నిక్కచ్చిగా చెప్పాలంటే ఒకప్పటి కన్నా ఇప్పుడు మెరుగ్గానే ఉన్నాయి! ప్రత్యామ్నాయం లేని దుస్థితి నుంచి ఒకటి పోతే మరొకటి అని ఎన్నుకోవడానికి జనానికి చాయిస్ పెరిగింది! ప్రజలకి ఈ 'కిటుకు' తెలిసి ఉపయోగించుకుంటున్నారు గానీ, రాజకీయ పార్టీలకే ఇంకా మారిన పరిస్థితి అర్ధం కావడం లేదు.

ప్ర  : ప్రాంతీయ పార్టీల వల్ల దేశ సమగ్రతకు భంగం వాటిల్ల్లుతుందనే ఆరోపణలపై మీ అభిప్రాయం?
జ : దేశసమగ్రతకి సూచి యేమిటి? మీరెప్పుడయినా ఒక విషయం ఆలోచించారా? భారతదేశం లోపల ఉన్న మనం ఈ దేశపు సరిహద్దులు దాటబోయే క్షణంలో యేమి జరుగుతుందో తెలుసా? కరెన్సీ మారుతుంది! దర్జాగా పాస్పోర్టుతో విమానంలో కూర్చుని దాటినా దొంగచాటుగా వాఘా దగ్గిర దాటినా మన రూపాయి అక్కడ చెల్లదు, అవునా? విదేశీ మారక ద్రవ్యం ఉనికిలోకి వచ్చేది కూడా అందువల్లనే! అది నిక్కచ్చిగా ఉన్నంత వరకూ దేశసమగ్రతకి యే ఢోకా ఉండదు. ప్రాంతీయ ఉద్యమాలైనా ఉప ప్రాంతీయ ఉద్యమాలైనా వాటివల్ల డైరెక్టుగా యేమీ ప్రమాదం రాదు! ఇంకా పెట్టుబడిదారీ విధానంలోని సంపద పంపకంలో హెచ్చుతగ్గులకి వ్యతిరేకంగా తమ ప్రాంతపు ప్రయోజనాల కోసం గట్టిగా పట్టుపట్టడం వల్ల మంచే జరుగుతుంది, కాకపోతే ఉద్యమనాయకులు దూరదృష్టి కలిగిఉండి ఉద్యమంలో ప్రమాదకార ధోరణులు పెరగకుండా జాగ్రత్త పడాలి!

ఒకానొకప్పుడు అనేక రాజ్యాలు ఉండేవి, యే రాజ్యానికి ఆ రాజ్యం కరెన్సీ, వ్యాపారం, వనరులు అన్నీ ప్రత్యేకంగా ఉండేవి, అయినా కాశ్మీరు నుంచి కన్యాకుమారి వరకూ ప్రజలు కాశీ, మధుర లాంటి పుణ్యక్షేత్రాల్ని మొత్తం భారతదేశానికి సంబంధించిన ఉమ్మడి విషయాలుగానే చూశారు. రాజ్యాలుగ విడివిడిగా ఉన్న కాలంలోనే ప్రజలు ఒక్కటిగానే ఉన్నారు. ఒకే దేశంలో ఉన్న ఇప్పుడెందుకు ఉండరు?!

ప్ర : మోడి ప్రభ తగ్గుతోందా?
జ : అవును. అమెరికా వెళ్ళి బ్రాండ్ ఇమేజిని డెవలప్ చేసుకోవటం, ప్రసంగాలతో ఆకట్టుకోవటం లాంటి వస్తువుల్ని అమ్మడానికి పనికొచ్చే ట్రిక్కులు ప్రధాని అయ్యేటందుకు ఉపయోగపడినాయి. కానీ ఇప్పుడు ప్రభుత్వంలొకి వచ్చాక యేమి చెయ్యాలి? అనేది బ్రాండ్ అమ్మకాల వాళ్ళు చెప్పలేరుగా!

ప్ర : పెట్టుబడిదారీ వ్యవస్థను మీరు సమర్ధిస్తారా?
జ : ప్రత్యామ్నాయం లేనప్పుడు చచ్చినట్టు సమర్ధించాల్సిందే గదా! చదివాను గాబట్టి మార్క్సిష్టు సూత్రాలలో నాకు వ్యతిరేకించాల్సిన విషయం కనపడలేదు. కానీ దాన్ని గట్టిగా సమర్ధించి చేసి చూపిస్తాం అన్నవాళ్ళే ఫెయిలయినప్పుడు దాని మీద అంతగా మోజు లేనివాళ్ళు గభాల్న ఫాలో అవ్వలేరుగా! ఒక కొత్త దారిలో వెళ్తున్నాం అన్నపుడు ఆ కొత్త దారిని అందరికీ పరిచయం చెయ్యాలనుకున్నవాళ్ళు బాధ్యతగ ఉండాలి తప్ప, వాళ్ళ ఫెయిల్యూర్సుని శత్రువులకి అంటగట్టేసి తప్పుకోకూడదు. అది ఫెయిలయితే సంతోషించే శత్రువులు ఉన్నారని ముందు నుంచీ తెలుసు!

ప్ర : 'భారతీయత' అంటే లేదా 'భారతీయ సంస్కృతి' అంటే కేవలం 'హిందూ మత సంస్కృతే' అని కొందరు అనడం సరయినదేనా? 'భారతీయ సంస్కృతి' అంటే మీరు ఏ నిర్వచనం చెప్తారు?
జ : నేను హిందువుని - ఆ మాట నేనెంత గర్వంగా చెప్పుకుంటున్నానో ఒక ముస్లిముకీ చెప్పుకునే హక్కు ఉంది!నేను "ఉరుమి" అనే సినిమా గురించి ఒక పోష్టు వేశాను. సరదాగా వెయ్యలేదు,ఆ సినిమాలో చూపించిన ప్రతి దృశ్యం వెనకా సంతోష్ శివన్ చాలా పరిశోధించి తీశాడనేందుకు సాక్ష్యాలు ఉన్నాయి. ఒక హిందూ రాజు తన కూతుర్ని ఒక ముస్లిముకి అదీ సాటివాడైన రాజు కూడా కాదు, తనే ఉద్యోగంలో పెట్టుకున్న మామూలు సిపాయికి ఇచ్చి చెయ్యాలని అనుకున్నాడు. హిందువు అయిన మరొక వీరుడు ఆరక్కల్ ఆయేషా అనే ఒక ముస్లిము యువతిని ప్రేమిస్తాడు.

మధ్య యుగాల నాటి  హిందూ రాజులు పాటించినది "సర్వధర్మ సమ భావన"! ఆచరణలో లోపాలు ఉండవచ్చు, కానీ అది ఒక ఆదర్శంగా ఉంది.  జిజియా పన్నులు వేసి ముస్లిం మత ప్రచారానికి అధికారాన్ని ఉపయోగించుకున్న మతఛాందసుడికి సోదరుడిగా ఒక ఉదారుడు కూడా పుట్టాడు. అది 'భారతీయత' అంటే! నాకు తెలిసినంత వరకూ ఇవ్వాళ మనం చరిత్రలో ప్రముఖంగా ప్రస్తావిస్తున్న యే హిందూ మతాభిమాని అయిన ప్రభువూ హిందూ మతానికి మాత్రమే పెద్దపీట వేసి మిగతా మతాల్ని అణచి వేయాలని చూసిన దాఖలాలు లేవు!!

మనకన్నా ముందు పుట్టి మన పుట్టుకకి కారణమైన పెద్దవాళ్లని మనం గౌరవించడం సహజమైనప్పుడు సహస్రాబ్ధాలుగా ఇక్కడ బతుకుతూ ఒక ఘనమైన సంస్కృతీ వారసత్వానికి కనీసపు గుర్తింపు కూడా అక్కర్లేదా? పేరుకైనా ఇక్కడ చాలాకాలం నుంచి 'హిందూధర్మం' అనేది ప్రజల్ని ప్రభావితం చేసి ప్రజల్ని ఉన్నతులుగా నిలబెట్టిందనే విషయానికైనా గుర్తింపు ఉండాలి కదా!

నేను హిందూ ధర్మ ప్రహేళికలు మొదటి భాగంలో ప్రస్తావించినవన్నీ తిరుగులేని సాక్ష్యాధారాలతో నిరూపించబడినవే!మనవాళ్లు కనుక్కున్న వెయ్యి సంవత్సరాల తరువాత  కనుక్కున్న వాడికి దాన్ని కనుక్కున్న పేరు అంటగడుతుంటే, దాన్ని గురించి ఆవేదన లేకపోగా మనవాళ్లే దుర్మార్గాన్ని అంటగడుతున్నారు. యేమి ప్రతిఫలాన్ని ఆశిస్తున్నారు వాళ్ళు?

ప్ర  : సాహిత్యం' అనే పదానికి నిర్వచనం చెప్పగలరా?
జ : ఆనందాన్ని కలిగించే అక్షర సముదాయం యే రూపంలో ఉన్నా సాహిత్యం అనే నిర్వచనంలోకి ఒదుగుతుంది. మంచి నేర్పకపోయినా ఆనందింప జేస్తే చాలు. కానీ, ఆ 'నేర్పడం' అనే గుణం కూడా ఉంటే 'డబుల్ ధమాకా' అవుతుంది!

ప్ర  : సాహిత్యం' ద్వారా మనిషి ప్రవర్తనలో వచ్చే మార్పు ఏమిటి?
జ : చిన్నప్పుడు తలిదండ్రులు చెప్పే మంచి మాటలు కూడా సాహిత్యమే - అది లేకపోతే అసలు బతుకే ఉండదు!తోడేళ్ళ మధ్యన బతికిన మౌగ్లీ కాల్పనిక పాత్రయే,అట్లా ప్రమాదవశాత్తూ జంతువుల మధ్యన బతికిన మనుషులు సరిగ్గా రెండు కాళ్లమీద నిలబడటం కూడా నేర్చుకోలేక హఠాత్తుగా ఈ కొత్తదనానికి అలవాటు పడలేక కొద్ది రోజుల్లోనే చనిపోయారు!మనం నేర్చుకునే ప్రతిదీ సాహిత్యం ద్వారానే నేర్చుకుంటాం.

ప్ర  : మీరు బాగా చదువుతారు కదా? అధ్యయనం వల్ల మీలో కలిగిన మార్పులు ఏమిటి?
జ : డిగ్రీలో ఫైనలియర్లో కాలేజి తరపున ట్రిప్పుకి ఖర్చు 5000/- అయితే 1000/- అని చెప్పి మా ఫ్రెండుకి కూడా నేనే కట్టి తీసుకెళ్ళాను. కేవలం వాడు లేకుండా నేను మాత్రం ఎంజాయ్ చేస్తానా? బరువు అయితే అవుతుందిలే అనే ఉద్దేశమే తప్ప ఇవ్వాళ గొప్పగా చెప్పుకోవాలనే దురద కూడా కాదు. అంత చేసిన నాకు వాడు చూపించిన సినిమా మాత్రం దరిద్రమైనదే! వాడి కక్కడో అమ్మాయి పరిచయమైనది, ఆ కాస్త పరిచయంతోనే వూహల్లో మేడలు కట్టేశాడు, తనని తనో పేద్ద రొమాంటిక్ హీరోలాగ వూహించేసుకున్నాడు. నేను కాస్త కిందకి దించబోతే నన్ను పురుగుని చూసినట్టు చూశాడు! వాణ్ణి సమర్ధించేవాళ్ళు చెప్పే సంగతులేంటో తెలుసా? ఆడవాళ్ళకీ ఇలాంటి సరదాలు ఉంటాయిరా! నీకెందుకు నువ్వు రెచ్చిపో అని వాళ్ళు చెప్పిన సీన్లు - రైళ్లల్లోనూ బస్సుల్లోనూ మగాళ్ళు రుద్దేస్తుంటే విసుక్కంటూ భరించే సీన్లని ఆడవాళ్ళు కూడా ఇష్తంగా ఫీలవుతారనే దరిద్రులు వాణ్ణి మునగ చెట్టు చిటారు కొమ్మన కూచోబెట్టారు. నా బుధ్ధి కూడా పొరపాటు చేసి నేను కూడా ఒక ఉత్తరం రాసి అడ్రసు రాసి పోష్తు చెయ్యరా! అని వాడి చేతికే ఇచ్చాను.మొదట్లో వాణ్ణి నేలకి దించుదామనుకున్న నేనే మనసు మర్చుకుని ఆ పని చెయ్యడానికి కారణం ఉంది - అక్కడేదన్నా సమస్య వస్తే పక్కనుంచి సాయం చెయ్యడం,వాడు చెప్పలేకపోతే నేనయినా చొరవ తీసుకుని ఆ అమ్మాయికి చెప్పి అవసరమయితే కిడ్నాపింగుల లాంటి సాయాలకి కూడా సిద్ధపడి పక్కనుంచి మాట సాయం చెయ్యొచ్చు గదా అని అనుకున్నాను. కనీసం యెందుకు రాశావురా? అని నిలదీస్తే చెప్పేవాణ్ణి గానీ అసలు మాటలే బందు చేసేశాడు.నాకు అప్పుడొచ్చిన కోపాన్ని నేను చదివిన సాహిత్యం వల్ల వచ్చిన మెచ్యూరిటీయే ఆపింది. లేదంతే చాలా గొదవ జరిగి ఉండేది! ఒకానొక క్షణంలో చంపడమా? చావడమా? అనే ఆలొచన కూడా వచ్చింది, అయినా తమాయించుకుని వెనక్కి తగ్గానంటే కారణం నేను చదివిన మంచి సాహిత్యమే!

ప్ర : కులం - మతం పై మీ అభిప్రాయం?
జ : మనకి తెలియకుండానే పుట్టుక ద్వారా ఒక కులానికి మతానికి అనుంబంధమై పోతాము. పెరిగి పెద్దయినాక స్వంత ఆలోచనల ద్వారా మన ఒక్కరి సంస్కారంలో వాటి ఛాయలు లేకుండా ఉండగలము. కానీ ఇతర్లతో వ్యవహరించేటప్పుడయినా వాటి ఉనికిని గుర్తించక తప్పదు! నాకయితే మిగతా అన్ని విషయాలలో ఉన్నట్టుగానే లిమిటేషనులో ఉంటే యే లిటిగేషనూ ఉండదు అనిపిస్తుంది, కానీ, 'లిమిటేషను ఇక్కడ' అని ఎవరు నిర్ణయించాలి? అన్నది ప్రశ్న! ఆ ప్రశ్నకి జవాబు అవసరమైనప్పుడే గొడవలు జరుగుతున్నాయి.

శ్రీశ్రీ చెప్పినట్టు పోటీలో న్యాయంగా గెలవలేనని తెలుసుకున్నవాడు రిఫరీని బెల్లించి గెలవడం కోసం కులాన్ని మతాన్ని తాయిలంగా వాడుకుంటున్నాడు. ఆ యవ్వారం జరగనప్పుడు ఎవడి కులం పట్ల వాడికి అంతో ఇంతో గర్వం ప్రతివాడిలోనూ ఉంది?!

ప్ర  : ప్రయివేటు రంగంలో రిజర్వేషన్లు కల్పించాలన్న డిమాండ్ సరయినదేనా? 
జ : ప్రభుత్వ రంగంలో అంటే చట్టాల్ని విధిగా పాటించాల్సిన బాధ్యత ఉంటుంది. అవి ప్రభుత్వం డైరెక్టుగా జీతభత్యాలు ఇస్తూ పోషిస్తున్న ఇన్సైడర్లు కాబట్టి ఒత్తిడికి లొంగుతాయ్. కానీ ప్రైవేటు రంగం అట్లా లొంగదు. ఒకవేళ బలవంతంగా లొంగదియ్యాలనుకుంటే బోర్డు తిప్పెయ్యడానికైనా రెడీగానే ఉంటాయి. వీలున్నంత వరకూ ప్రభుత్వం దగ్గిర తమ పనులు సానుకూలం చేసుకోవడమే తప్ప ప్రభుత్వం మాట వినే ఔదార్యం వాళ్ళకి ఉండదు. ప్రభుత్వాధికారం చేపట్టే రాజకీయ పక్షాలకి గూడా వాళ్లని కెలికి తమ పీట కిందకి నీళ్ళు తెచ్చుకునే ధైర్యం ఉండదు. అయిదేళ్ళ కొకసారి జాతకాలు మారే యవ్వారం కదా! ప్రాక్టికల్ గా వర్కవుట్ కాదు.

ప్ర  : రిజర్వేషన్ల విధానంలో రావలసిన మార్పులున్నాయా? రిజర్వేషన్లు ఇంకా ఎంత కాలం కొనసాగించాలి?
జ : తమకి రిజర్వేషన్లు కావాలి అనుకంటున్న వాళ్లకి బోరు కొట్టనంత కాలం రిజర్వేషన్లు అవసరమే! పెట్టుబడిదారీ విధానంలో ఉన్న పోటీ ఒక్కోసారి తీవ్రమైనపుడు అమానవీయమైన సన్నివేశాలు కూడా యెదురు కావచ్చు! భీభత్సం జరిగిపోయాక నిందించి ప్రయోజనం లేదు. వెనకబడితే వెనకేనోయ్ అనేది నిష్ఠుర సత్యమే అయినా ఒకసారి పోటీలో వెనకబడినంత మాత్రానే వేస్టు క్యాండిడేట్ కింద తోసేస్తుంటే వెనకబడిన వాళ్లందరికీ ఆత్మహత్యలు తప్ప మరోదారి ఉండదు కదా!? దాన్ని నివారించడం కోసమయినా యేదో ఒక రూపంలో రక్షణలు ఉండాల్సిందేనని అనిపిస్తుంది.

ప్ర  : కుల,మత రిజర్వేషన్లు అవసరమా? 
జ : మన దేశంలోని కులవ్యవస్థ సంక్లిష్ఠంగా ఉండడం వల్ల కొన్ని కులాలు పూర్తిగా ఇవ్వాల్టి అవకాశాల్ని అందిపుచ్చుకునే విద్యకి దూరంగా ఉండటం వాస్తవమే గాబట్టి కులపరమయిన రిజర్వేషన్లు న్యాయమే కానీ మతపరమయిన రిజర్వేషన్లు మాత్రం ఒప్పుకోకూడదు.

దానికి మొట్టమొదటి అబ్జెక్షన్ - ఒక మతం బలహీనమైనది. మరొక మతం బలమైనది అని యెట్లా నిర్ణయిస్తారు? సంఖ్యాపరమయిన ఆధిక్యత శాశ్వతం కాదు. యే అనూహ్య పరిస్థితుల వల్లనయినా సరే దాన్ని అనుసరించేవాళ్లు గనక పెరిగితే కేవలం ఒక్క సంవత్సరంలోనే అప్పటివరకూ సంఖ్యాపరంగా అధికులైనవాళ్ళు అల్ప సంఖ్యాకులుగా మారిపోవచ్చు!

అయినా ప్రతి మతంలోనూ మా దేవుడు సర్వశక్తిమంతుడు అని చెప్పుకుంటుంటే యే మతాన్ని బలహీనమైనది అని ప్రకటిస్తే ఆ మతానికి చెందిన దేవుడు కూడా బలహీనమైనవాడు అయిపోడా!? దీనివల్ల మతాల మధ్య ఇప్పుడు లేని కొత్త గొడవలు కూడా రావొచ్చు.

ప్ర  :  " భారత దేశం పేద ప్రజలున్న సంపన్న దేశం " - ఈ వాక్యం ఇంకా మనం ఎన్నాళ్లు చదువుకోవాలి?
జ : బ్రాండ్ ఇమజింగు స్ట్రాటజీలని ఉపయోగించుకుని యే గొట్టాం గాడయినా ప్రధానమంత్రి పదవికి ఎదగవచ్చు అని నిరూపించి తీరా పదవిలోకి వచ్చాక అసలు పనిలో నైపుణ్యం చూపించాల్సిన టైములో దిక్కులు చూస్తున్న మోదీ లాంటివాళ్ళు హీరోలుగా చెలామణీ అయినంత కాలం! 'మన్ మోహన్ సింగు'ని 'మౌన మోహన సింగు' అని జోకులేసి ఇవ్వాళ తను చేస్తున్నదేమిటి?

బాబు, కేసీఆర్, మోదీ - వీళ్ళ ముగ్గురి గురించి ఒక పోష్తు యెప్పుడో వేశాను. వీళ్ళిద్దరికీ విభజన వల్ల వచ్చి పడిన సమస్యలు అనే వెసులుబాటు ఉంది కాబట్టి ప్యాసు మార్కులన్నా వస్తాయి, మోదీ కయితే అవీ రావు. ఘోరంగా ఫెయిలయ్యాడు!  యెందుకు ఫెయిలయ్యాడు అనేది మాత్రం తనకి కూడా అర్ధం కాదేమో?!

ప్ర  : ఇండియాలో గ్రామాలు అభివృద్ధి చెందాలంటే ఏం చేయాలి?
జ : ఇప్పటివరకూ నగరాలు యెట్లా బాగూపడినాయో వాటిని పల్లెలకీ తీసుకెళ్ళాలి!

ప్ర  : గాంధీపై మీకు ఎందుకు కోపం? గాంధీని 'మహాత్ముడు' అనడం మీరు సమర్ధిస్తారా?
జ : కాంగ్రెసుని ద్వేషించడం గురించిన భాగాల్లో గాంధీ గురించి నా అభిప్రాయాల్ని వివరంగా చెప్పాను.పాడిందే పాడరా అని ఇక్కడ కూడా రిపీట్ చెయ్యదం దేనికి? అక్కడ కూడా వ్యక్తిగతమైన విషయాల్నిఎత్తలేదు, వాళ్ళ జీవితంలో ఉన్నప్పటికీ! వ్యక్తిగతమయిన అంశాలు యెత్తి విమర్శించాలంటే నెహ్రూ గురించిన పోష్తులో ఎడ్వినా గురించి యెత్తకుండా ఉంటానా? వాళ్ళ వల్ల ఈ దేశ చరిత్ర యెలా ప్రభావితమైంది? అనే విషయం మాత్రమే ప్రస్తావించాను. నాకు నోటిదురుసు అంటగడుతున్నవారు కూడా ఆయా భాగాల్లో నా భాష చూస్తే ఆ సంయమనం చూసి ఆశ్చర్యపోయినా ఆశ్చర్యం లేదు!

ప్ర: ఇంకా మీరు చెప్పదలచుకున్నదేమైనా.....?
జ : కుర్రాళ్ళకి ఆజీవ పర్యంతం  ఒక్కొక్క వయస్సులో ఒక్కొక్క  ప్రశ్న వేసుకుని జవాబులు రాబట్టాల్సిన పశ్నల లిస్టు ఒకటి ఉంది:

1-.20 యేళ్ళ వయసులో "నేను నా ముందుతరం కన్నా ఒక మెట్టు పైకి యెదగగలనా?" అని ప్రశ్న వేసుకోవాలి!

2.-25 యేళ్ళ వయస్సులో "ఈ చదువు పూర్తి కాగానే మంచి ఉపాధి చూసుకోగలనా?" అని ప్రశ్నించుకోవాలి!

3.-30 యేళ్ళ వయస్సులో "నేను కుటుంబ జీవనానికి సరిపోతానా?" అని ప్రశ్నించుకోవాలి!

4.-40 యేళ్ళ వయస్సులో "నా కార్యరంగంలో నేను ప్రభావశీలంగా ఉన్నానా?" అని ప్రశ్నించుకోవాలి!

5.-50 యేళ్ళ వయస్సులో "నేను ఇప్పటి కిప్పుడు ఐచ్చిక విశ్రామం కోరుకున్నా సుఖంగా ఉండగలనా" అని ప్రశ్నించుకోవాలి!

6.-60  యేళ్ళ వయస్సులో "నేను ముందు తరాల వాళ్ళు నన్ను గుర్తుంచుకునేది యేదయినా సాధించానా?" అని ప్రశ్నించుకోవాలి!

వీటిల్లో యే అయిదింటికి "అవును" అనే జవాబు రాబట్టుకోగలిగినా మీరు సామాన్యులు కారు.

P.S: ఈ ప్రశ్నల లిస్టు నా మైండులోకి వచ్చేసరికే మొదటి ప్రశ్నలకి "లేదు" అనేవి ఖరారు అయిపోయాయి.కాబట్టి ఇవి నాకు పని చెయ్యాల్సిన టైము దాటిపోయింది. కానీ పట్టించుకుంటే కుర్రాళ్ళకి తప్పకుండా మేలు చేస్తాయి!

- పల్లా కొండల రావు.

-------------------------------------------------------------------------
మీకు నచ్చిన బ్లాగరును ఇంటర్వ్యూ చేయాలనుకున్నా, మీకు నచ్చిన ఇంటర్వ్యూని అందరితో పంచుకోవాలనుకున్నా వివరాలకు ఇక్కడ నొక్కండి. ప్రజలో ఇంటర్వ్యూ పోష్టుల వివరాలకోసం ఇక్కడ నొక్కండి.
--------------------------------------------------------------------------
*Republished
Reactions:

Post a Comment

  1. బాగుంది. మీ ప్రొఫైల్ ఫోటో ని చూడటమే కాని , మిమ్మల్ని చూడటం ఇదే మొదటిసారి .
    ఈ వయసులో కూడా చిచ్చర పిడుగు బిరుదు maintain చేయడం గ్రేట్ .
    మీ విషయ పరిజ్ఞానం , వాదనా పటిమ తో మీరు మరిన్ని చర్చలు చేయాలని ఆశిస్తూ ..

    ReplyDelete
  2. చాలా బాగుంది... హరిబాబు గారి పోస్టులు చదివినప్పుడు వచ్చే కిక్కే వేరబ్బా...
    హరిబాబు గారూ..
    మీరు మీలానే చాలా బావున్నారు..మీ భాష కూడా భేషుగ్గా ఉంది... మీ భాష మరీ సుకుమారంగా చేయొద్దండీ...
    కొండల రావు గారికి కృతజ్ఞతలు.

    ReplyDelete
  3. Nice interview. Thanks to Hari Babu, Kondala Rao and Shyamaleeyam.

    ReplyDelete
  4. KVP Ramachandrarao hails from Ampapuram near Telaprolu. Is he related to you? I am at Nidadavolu rightnow.

    ReplyDelete
    Replies
    1. పుష్కర స్నానానికి వచ్చావా ప్రవీణ్ ?

      Delete
    2. దూరపు బంధుత్వం ఉంది.వార్తలు తెలుస్తుంటాయి గానీ దూరపు బంధుత్వం కాబట్టి ముఖాముఖీ కలిసే అవకాసం గూడా లేదు!కామన్ రిలేటివ్స్ కూడా లేరు.

      Delete
    3. @Kasi, I am an atheist and I am even aware about skin diseases caused by crowd bathing. Therefore you need not think that I bath in pushkaram.

      @Hari, my inquiry is just an anthropological survey. I am aware that there were two or three velama zameendari estates in Krishna district during British era. Therefore I did a formal inquiry on you as you claimed to be from Telaprolu estate.

      Delete
    4. No problem praveen,for inquisitive enquirers I am always open.i know you didn't have mockery in your question.

      most welcome for serious questions!

      Delete
    5. హరి ప్రవీణ్ గార్లకు ఒక ప్రశ్న. వెలమలు తెలంగాణాలో దొరలు, ఆంధ్రలో బీసీ అనుకున్నాను. ఈ అవగాహన సరికాదా, ఆంధ్రలో దొరలు బీసీలు అంటూ ఉపకులాలు ఉన్నాయా?

      This is only to understand the nature of rural power structure. I am not against any caste.

      Delete
    6. ఆంధ్రాలోని వెలమల్లో నాలుగు శాఖలు ఉన్నాయి. వాటిలో ఆది, పద్మనాయక శాఖలు ఒ.సి.లు. బొబ్బిలి, పిఠాపురం, నూజివీడు తదితర సంస్థానాల అధిపతులు పద్మనాయక శాఖవాళ్ళు. పోలినాటి & కొప్పుల శాఖలవాళ్ళు బి.సి.లు. ఎర్రన్నాయుడు పోలినాటి శాఖకి చెందినవాడు, సూర్య పత్రిక సంపాదకుడు నూకారపు భాస్కరరావుది కొప్పుల శాఖ.

      తెలంగాణలోని వెలమల్లో ఉన్నవి పద్మనాయక, ఏకో, గోనె & నాయక్ శాఖలు. మరాఠా సంప్రదాయాల్ని పాటించే మరాఠా వెలమ అనే ఇంకో శాఖ కూడా ఉంది. తెలంగాణలోని వెలమ రాజకీయ నాయకుల్లో ఎక్కువ మంది పద్మనాయక శాఖకి చెందినవాళ్ళే.

      పద్మనాయకులని కొన్ని ప్రాంతాల్లో "రాచ వెలమ" అనీ, కొన్ని ప్రాంతాల్లో "శిఖామణి వెలమ" అనీ, కొన్ని ప్రాంతాల్లో "వెలమ దొర" అనీ అంటారు. రాయగడలో మా వీధిలో ఉన్న పద్మనాయకులు కాకినాడ నుంచి వలస వచ్చారు. వాళ్ళు తమ కులం పేరు వెలమదొర అని చెప్పుకున్నారు. వాళ్ళలో ఒక కుటుంబంవాళ్ళు బొబ్బిలి రాజుల బంధువులు. బొబ్బిలి రాజులు తమ ఎన్నికల affidavitsలో తమ కులం పేరు "పద్మనాయక వెలమ" అని వ్రాసేవాళ్ళు. జలగం వెంగళరావు తన కులం పేరు "వెలమ" అని వ్రాసేవాడు కానీ అతని స్వగ్రామం సోపేరులోని వెలమ వీధి వాసులు తమ కులం పేరు "వెలమ దొర" అని చెప్పుకుంటారు.

      Delete
    7. నీ రీసెర్చి బాగుంది!వీటిల్లో నాకు తెలియనివి కూడా చాలా ఉన్నాయి.తెలుసుకోవడంలో తప్పు లేదు.కేసీఆర్ తాతలు విజయనగరం నుంచి వెళ్ళారని అంటున్నారు,కరెక్టేనా?

      మాలో పద్మనాయక కానివార్ని గౌన వెలమ అంటారు.అది రూపాంతరం చెంది గోనెలమ అంటారు.ఒక రకంగా సెకండ్ గ్రేడ్ వెలమ అన్నమాట!

      మొత్తం వేలంల్లో 72 శాఖలు ఉన్నాయి.బొబ్బిలి యుధ్ధం కధ వెలమల్లో బంధుత్వాలు కూడా ఉన్న బొబ్బిలి,విజయనగరం రాజ్యాల మధ్యన పంతాల కోసం జరిగిన యుధ్ధం!

      అటువైపు కట్టబ్రహ్మనకి సమకాలికుదైన నూజివీడు జమీందారు నారయ్యప్పారావుని రెబెల్ అని పిలిచేవాళ్ళు.ఒక మాజిక్ చేశాడు!అప్పట్లోనే మౌంట్ గోమరీఎ అనేవాడ్కింద పెద్ద సైన్యంతో ఇంగ్లీషువాళ్ళు దాడి చేస్తే తనే కోటగోడ తెరిచి శత్రుసైన్యం మధ్యనుంచి దాటుకుని బ్యత్తపడి అప్పట్నించీ మళ్ళీ ఇంగ్లీషువాళ్ళే రాజీకి వచ్చే వరకూ ప్రజల మధ్యనుండే పరిపాలించాడు.

      Delete
    8. Bobbili Padmanayakas descended from Venkatagiri Padmanayala family near Nellore, Venkatagiri Padmanayakas descended from Velugodu Padmanayakas near Kurnool.

      Delete
    9. Jalagam Vengalrao's native village Soperu was a part of the erstwhile Bobbili estate. I think even Jalagam's family descended from Velugodu Padmanayaka family.

      Delete
  5. చాలా బాగుంది... హరిబాబు గారి పోస్టులు చదివినప్పుడు వచ్చే కిక్కే వేరబ్బా...
    హరిబాబు గారూ..
    మీరు మీలానే చాలా బావున్నారు..మీ భాష కూడా భేషుగ్గా ఉంది... మీ భాష మరీ సుకుమారంగా చేయొద్దండీ...
    కొండల రావు గారికి కృతజ్ఞతలు.

    ReplyDelete
    Replies
    1. కిరణ్ గారు ధన్యవాదములు. వాదన సుకుమారం కాకూడదు గానీ , భాష ఎంత మంచిగా ఉంటే విషయంపై పట్టు ఉన్నవారి వాదనకు ఇంకా పట్టు పెరుగుతుంది.

      Delete
  6. హరిబాబు గారు,

    మీ పోస్టులు కామెంట్లు పరిశీలిస్తే పరిమాణం ఎక్కువ లోతు తక్కువ, ఆకారం ఎక్కువ ఆలోచన తక్కువ.… మొత్తంగా చూస్తే సరుకు ఎక్కువ సారం తక్కువ.

    రమణ గారిలాంటి వారి మీద రంకెలేయడానికి, నీహారిక గారి మీద శ్లేషార్ధ వ్యాఖ్యలు చేయడానికి మీరు చూపే ఉత్సాహంలో లేశమాత్రమైనా మీ ఆలోచనలను validate చేసుకోవడానికో, రిఫరెన్స్ లని సరిచూసుకోడానికో, విషయాల్ని fact -check చేసుకోవడానికో చూపిస్తే, మీరు రాసే రాతలకి విలువ పెరుగుతుంది. Logic, reasoning & critical thinking ఏమాత్రం లేకుండా టన్నుల లెక్కన పేజీలు నింపితే మీ చాతీ వైశాల్యం నాలుగంగుళాలు పెరగోచ్చేమో గాని మిగతా ప్రపంచానికి జరిగే మేలు శూన్యం.

    వీలు చూసుకొని ఈ free కోర్సులు చెయ్యండి . చాలా ఉపయోగపడతాయి .

    https://www.coursera.org/course/thinkagain
    https://iversity.org/en/courses/critical-thinking-in-today-s-communication

    ReplyDelete
  7. @EDge.
    ,
    point1:రమణ గారిలాంటి వారి మీద రంకెలేయడానికి,
    ans:ఆయన గారే నా తప్పేమీ లకుండా నా మీద రంకెలేసిన్ అవిషయం మీకు తెలుసా?మొదటిసారి ఆయన కామెంత్లు బందు చేసినప్పుదు వరూధిని బ్లాగరు తన బ్లాగులో ఒక పోష్తునే ఆయన కామెంత్లు బంద్ చెయ్యడం మీద జోకులేస్తూ వేశారు.అక్కడ కామెంట్లు వేసిన వారందరూ ఆయన మీద జోకు లేస్తూ కామెంత్లు వేసిన వాళ్లే!అయినా సరె మిగతా వాళ్ళవి హాస్యంగానూ నాది దుర్మార్గంగానూ చిత్రించి రెచ్చిపోయింది ఆయనే.నా తప్పేమీ లేకుండానే ఆయన పెట్టిన ముక్క చివాట్లన్నే భరించి ఆయనకే క్షమాపన క్కోరుతూ యెన్నోసార్లు కామెంత్లు వేసినా పట్టించుకోకుండా అహంకారం చూపించినా అయనే మంచివాడు అనిపిస్తున్నదా మీకు?

    point2:నీహారిక గారి మీద శ్లేషార్ధ వ్యాఖ్యలు చేయడానికి మీరు చూపే ఉత్సాహంలో లేశమాత్రమైనా

    ans:నేను పదే పదే తన ముద్దు పేరుతో గాక అసలు పేరుతో వ్యవహరించడానికి గల సీరియస్ కారణాన్న్ని యెల్లరకూ వివరిస్తాను, యెందుకంటే మాటిమాటికీ నన్ను ఆ విషయంగానే ఒత్తిడి పెడుతున్నది గనక - అవధరించండి!తనకు తన పేరు అనే ఒక వ్యక్తిగతమైన సింబల్ పట్ల ఒక గట్టి పట్టుదల ఉన్నది,తన పేరు పట్ల మమకారము ఉండి తన పేరును కించపర్చితే తను సహించలేని మనస్తత్వం తనలో ఉన్నప్పుడు హిందువులకు మతపరమైన సింబల్ అయిన రాముణ్ణి సందర్భం ఉన్నా లేకున్నా ప్రస్తావించి కించపరుస్తూ యెదటివారి మనోభావాలకు విలువనివ్వకపోవడం యెంతవరకు సభ్యతాయుతమైనది? భావంలో యెంత అసభ్యత ఉన్నప్పటికీ భాష సభ్యతాయుతంగా ఉంటే చాలునా!

    వారి పర్సనల్ సింబల్స్ పట్లా వాటికి దక్కాల్సిన గౌరవాల పట్ల చాలా గట్టిగా ఉంటారు, డిమాండ్ చేసి అయినా సాధించుకోవాలని చూస్తారు!. కానీ హిందువులు మాత్రం తమ కలెక్టివ్ సింబల్ అయిన రాముడి పట్ల వాటిని వీరి నుంచి డిమాండ్ చెయ్యకూడదు,యేమి ఆదర్శవంతమైన సమదృష్టి?!

    “ఎవరేది కోరితే అది సాధ్యమైనంతవరకూ చేసాను.” అనే మాటకు అర్ధమేమిటో!ఈ విధంగా వాదించమని యెవరైనా కోరుతున్నారా ఈమెని? యెందుకంటే, నేను ఈ మాటని ఈమె నుంచి చాలాచోట్ల చాలాసార్లు విని ఉన్నాను!

    అయినా ఆమె భాష సభ్యాతాయుతంగా ఉంటుంది గనక గౌరవనీయురాలే,కదా?!

    ReplyDelete
  8. @haribabu garu,


    మీ ఆలోచనలను validate చేసుకోవడానికో, రిఫరెన్స్ లని సరిచూసుకోడానికో, విషయాల్ని ఫచ్త్ -చెచ్క్ చేసుకోవడానికో చూపిస్తే, మీరు రాసే రాతలకి విలువ పెరుగుతుంది. Logic, reasoning & critical thinking ఏమాత్రం లేకుండా టన్నుల లెక్కన పేజీలు నింపితే


    ఎవరైనా విమర్శిస్తే అందులో ఉన్న పాయింట్ ఏమిటన్నది గట్టిగా పట్టుకోవాలి,మన మంచికోసమే చెపితే మార్చుకోవాలి.అసలు పాయింట్ వదిలేసి,నా ముద్దు పేరుని పదే పదే జపం చేస్తే మీకొచ్చేది ఏమీ లేదు,నేనేమన్నా రాముడినా మీరు పుణ్యఫలం పొందడానికి ? ముద్దు పేరు అని అనకండి,కలం పేరు అని అనండి.

    ఎవరేది కోరినా అది చేసాను అన్నది కూడా మీరు 100 సార్లు పద్యం ఇంపోజిషన్ వ్రాయమంటే వ్రాసాను కదా ?

    ఇకపోతే మీ పోస్ట్ ని టాంపరింగ్ చేసానని ఆరోపిస్తున్నారు,నా బ్లాగింగ్ కి కొత్తల్లో సీనియర్స్ నన్ను ర్యాగింగ్ చేసారు.నేను సరదాకే కదా అని నవ్వుకున్నాను,మీరు నాకన్నా బ్లాగింగ్ లో జూనియర్ కదా ? నేను మిమ్మల్ని ర్యాగింగ్ చేస్తే పైరయ్యిపోయారు.మగవాళ్ళే ర్యాగింగ్ చేయాలా ? రేప్రొద్దున్న మీరు మీ మనవరాళ్ళకి చెప్పుకోడానికి నాలుగు మెమరీస్ ఉండాలా వద్దా ?

    edgeగారు చెప్పినదాంట్లో పాయింట్ అర్ధం చేసుకుని క్లుప్తంగా సూటిగా ప్రశ్నించడం,సమాధానం ఇవ్వడం అలవాటు చేసుకోండి.అనామకులు కావాలో మీ శ్రేయోభిలాషులు కావాలో మీరే తేల్చుకోండి ! విమర్శ అంటే వేషం మార్చుకు వచ్చే ప్రశంస అని అర్ధం చేసుకునేవాళ్ళకు అర్ధం అవుతుంది.ప్రతి విషయాన్నీ నెగటివ్ గా చూడడం మీకు అలవాటు,మీ అలవాటు వల్ల మీరే నష్టపోతున్నారు.తెలుసుకుంటే మీకే మంచిది.

    ReplyDelete
    Replies
    1. నీహారిక గారూ,

      1. ఇకనుంచి మీతో వాదనకి దిగను లెండి!నిన్ననే రచ్చబండ బ్లాగులో చెప్పేశాను.ఒకసారి గట్టిగా సంకల్పించుకుని కామెంటు వేశాక అందుకు భిన్నంగా నడుచుకోను - అది మీకూ తెలుసు!

      2.>>ఇకపోతే మీ పోస్ట్ ని టాంపరింగ్ చేసానని ఆరోపిస్తున్నారు,నా బ్లాగింగ్ కి కొత్తల్లో సీనియర్స్ నన్ను ర్యాగింగ్ చేసారు.నేను సరదాకే కదా అని నవ్వుకున్నాను,మీరు నాకన్నా బ్లాగింగ్ లో జూనియర్ కదా ? నేను మిమ్మల్ని ర్యాగింగ్ చేస్తే పైరయ్యిపోయారు.మగవాళ్ళే ర్యాగింగ్ చేయాలా ? రేప్రొద్దున్న మీరు మీ మనవరాళ్ళకి చెప్పుకోడానికి నాలుగు మెమరీస్ ఉండాలా వద్దా ?
      ans:ఇప్పుడు దీని గురించిన గుంజాటన కూడా పోయింది:-)

      3.మీ స్వభావంలో మంచితనం గురించిన క్లూలు కొన్ని కనపడినాయి,నిజమే!కానీ మీ రాజకీయ పరమైన అభిప్రాయాలతో నేను యేకీభవించలేకుండా ఉన్నాను.కొంతకాలం నుంచి మీ ప్రతి కామెంటునీ నిశితంగా పరిశీలించాను.

      4.అయితే రాముడి గురించి మీరు వేస్తున్న తింగరిగా కనిపించే కామెంట్లలో గూడా యేడు ఘడియల మంత్రిత్వం తోనే అద్భుతమైన రాజనీతితో బ్రహ్మనాయుడికి చుక్కలు చూపించిన నాయకురాలు నాగమ్మ లోని నిగూఢమైన వ్యూహరచనా చాతుర్యం ఉంది!

      5.సరే,ఇప్పుడు ఒక సర్రియలిస్టిక్ కధాత్మక పోష్టులో వచ్చే శ్లేషాత్మక వ్యాఖ్యల్ని కంటిన్యుటీ కోసం ఆ పోష్టు వరకూ కొనసాగించి తర్వాతినుంచీ ఇప్పుడు చేస్తున్నట్టుగా మీమీద ధూర్తంగా దాడి చెయ్యను..ఆ పోష్టుకి సంబంధించి మీ ప్రస్తావనల్ని కూడా మీరు చెప్పిన ర్యాగింగ్ కింద తీసుకుని స్పోర్తివ్ ధోరణి చొపిస్తే సంతోషం!

      6.నేనలా ఉద్రేకపడటానికి మీరు చేసిన ఒక సాంకేతికపరమైన తప్పు కారణం.మీ గురించి నా అనుమానాలని తీర్చుకుందామని అన్న్నిసార్లు సూటిగా ప్రశ్నించినా మీరు సూటిగా జవాబు ఇవ్వకుండా ర్యాగింగ్ తరహాలోనే జవాబివ్వటం!

      7.ఒకే విషయం గురించి పరస్పర విరుధ్హమైన వాదనలతో యెదటివార్ని గందరగోళంలోకి నెట్టేస్తే వాళ్ళిద్దరూ మగవాళ్ళే అయినా ఒకరు ఆడ ఒకరు మగ అయినా ఇద్దరూ ఆదవాళ్ళే అయినా యెదటివాళ్ళు తమని వెర్రివెధవల్ని చేస్తున్నారని కోపం యెగదన్నుకురావతం సహజమే కదా?
      ఉదా:విడాకులను లాభానికి వాడుకుంటున్నారు,వివాహ వ్యవస్థ భదంగా ఉండాలని ఆశిస్తున్నానౌ అన్న మీరే ఏతీయం నుంచి దబ్బు డ్రా చేసిననత ఈజీగా విడాకౌలు వచ్చెయ్యాలి అనటం.నిజమగా విడాకౌలు అంత ఈజీగా ఇవ్వటం జరిగితే ఈ క్రూరమైన ప్రపంచంలో స్త్రీలకి యెక్కువ అన్యాయం జరుగుతుంది,కాదనగలరా?నేను సూచించే సబబైన పధ్ధతి,ఇప్పుడు అరుదుగా జరుగుతున్నట్టు వారిద్దరి మంచి కోరే పెద్దలు బాధ్యత తీఎసుకుని మంచీ చెడూ తమ అనుభవంతో విశ్లేషించి చెప్పడం.అయినా విడాకులు కావలసిందే అంటే వారి స్వేచ్చకి వారిని వదిలివెయ్యటం - యెలా వుంది?
      P.S:నేను జీవితమలో రెండే రెండు సార్లు ఇద్దరైకి మాత్రమే క్షమాపణలు చెప్పాను.మోద్టిది నాలో తప్పు లేదని ఇప్పటికీ బలంగా నమ్ముతూనే ఉన్నా మన కుటుంబాలలఓ ఉండే సున్నితమైన విషయాల వల్ల చెప్పాను.రెందవ సారి మీపట్ల దురుసుగా వ్యవహరించదం వల్ల మీకు నిజంగా బాధ కలిగి ఉంటే(పైన ర్యాగింగ్ ఉదాహరణ చెప్పారు గాబట్టి మీరు స్పోర్టివ్ అని తెలుసు,అయినా...) మిమ్మల్ని!

      మరొక మాట: ఇప్పటికే పబ్లిష్ అయ్యిన కామెంట్ల వల్ల్ల జరగాల్సిన రచ్చ రచ్చ రిపేరు చెయ్యలేనిదే గాబట్ట్టి గతం గతం అనుకుని ఇకముందు మాత్రం అలాంటివి నా పోష్టుల్లో ఉంచను,సరేనా!

      Delete
    2. హరిబాబు గారు,

      ధన్యవాదాలు, ఇంతకుముందు 2010 లో అనుకుంటా చాలా యుద్ధాలు జరిగాయి.నేనెప్పుడూ స్పోర్టివ్ గానే ఉన్నాను.ఆడవాళ్ళు ఫలానా పద్ధతిలోనే ఉండాలి అని గిరిగీసుకోవడం వల్ల వచ్చిన అపోహల వల్ల కలిగిన ఆవేశాలే గానీ ఒకరినొకరు ద్వేషించుకోడానికి ప్రత్యేక కారణాలేమీ ఉండవు.వదిలేద్దాం.

      నన్ను మొదట్లో మంచుపల్లకి బ్లాగర్ తింగర వాదన అన్నందుకే చాలా ఆవేశపడిపోయాను,ఇపుడు కోపం రావడం లేదు.నేను అర్ధమయ్యేటట్లు చెప్పే వరకూ నాది తింగరివాదనలాగే కనిపిస్తుంది.ఆ విషయం నాకూ తెలుసు.

      మీ బ్లాగు మీ ఇష్టం,మీరు ఫలానా విధంగా నడుచుకోవాలి అని నేను ఎవరికీ సలహాలు ఇవ్వడం కానీ రూల్స్ పెట్టడం గానీ చేయను,రూల్స్ పెడితే వాటిని బ్రేక్ చేయాలనిపిస్తుంది.స్వేచ్ఛకే నా ఓటు,మీరు మీ మనసుకు నచ్చినట్లు వ్రాయండి,ఇతర బ్లాగర్లను మీ బ్లాగులో అసభ్యంగా తిడుతుంటే డెలిట్ చేయండి.ఒక మేకు గోడకి కొట్టి గాయం చేసేసిన తర్వాత మేకు తీసేసినా గాయం కనిపిస్తూనే ఉంటుంది.కనీసం అజ్ఞాతల బూతులు,నువ్వెందుకు ఆంధ్రా బ్లాగులోకొచ్చావు అని నిలదీసే వారి కమెంట్లను డెలిట్ చేయండి.వారు అనదలుచుకున్నది వారు అనేసారు,మీరు డెలిట్ చేస్తే ఇతర బ్లాగర్లకూ సంతోషంగా అనిపిస్తుంది.మోడరేషన్ పెట్టడం అందరికీ సాధ్యం కాదు.ఈ సలహా కూడా బ్లాగర్ల సమాజ సంక్షేమం కోసం మాత్రమే ! నా గురించి కాదు.

      ఒక సమస్య పరిష్కరించాలని మనం ఆలోచిస్తున్నపుడు ఆ సమస్య వేళ్ళను ముందు పట్టుకోవాలి.విడాకుల గురించి ఆలోచించే ముందు వివాహ వ్యవస్థ లోపాలను గురించి ఆలోచించాలి.లోపాలను సవరించకుండా వ్యవస్థని నిలబెట్టలేము. ఏ విధంగా చూసినా విడాకుల సమస్య మీకన్నా మాకే నష్టం కాదంటారా ? ఆర్ధికంగా ఉన్నతులైన వారైనా సరే సమాజం లో మెలగవలసినదే కదా ? అయినా సరే వేగంగా విడాకులిచ్చేయాలి అని ఎందుకంటున్నానంటే పిల్లల భవిష్యత్తు పాడవకూడదనే కాదు ఒక మనిషిని బలవంతంగా కట్టిపడేయడం వల్ల ద్వేషమే తప్ప ప్రేమ పెరగదు.ఆడవాళ్ళే/మగవాళ్ళే ఓర్పుగా ఉండాలి అని ఉద్భోధించినా ప్రస్థుత కాలంలో జరిగేపనేనా ?

      నన్నే తీసుకోండి కొన్ని విషయాల్లో మొండిగా వాదిస్తున్న నన్ను జీవితాంతం సమాజం కోసం ఎందుకు భరించాలి.నన్ను వదలరు అని తెలిసాక నేను ఇంకా విచ్చలివిడిగా ప్రవర్తిస్తే తన పరిస్థితి ఏమిటి ? సభ్యతగా,సంస్కారంగా మాట్లాడుతున్నాను కాబట్టి విడాకులివ్వకూడదు అని అనడం కరెక్ట్ కాదు కదా ? ఇపుడు చట్టాలు అలాగే ఆడవాళ్ళకే సపోర్టుగా ఉన్నాయి.నాలాంటి వాళ్ళని వదిలించుకోడానికైనా వేగంగా విడాకులివ్వాలి.సుకుమారంగా ఉండేవాళ్ళ వల్ల గొడవలే రావా ? వస్తాయి,తప్పకుండా వస్తాయి.

      మూడే ముక్కల్లో విడాకులిచ్చేస్తే ఎవరైనా లాభపడవచ్చు కానీ దాని శాతం చాలా తక్కువ.ముస్లిం లకూ మనకూ కంపేర్ చేస్తే ముస్లిం లలో విడాకులు తక్కువ.విదేశాల్లో కూడా స్వేచ్చ ఉంది,అయినా విడాకులున్నాయి.నేననేది ఏమిటంటే విడాకులు తీసుకోడానికీ వేగంగా ఇవ్వడానికీ సంబంధం లేదు పైగా అక్రమ సంబంధాలూ,హత్యలూ ఆపవచ్చు.విడాకులు తీసుకోకుండా ఏమి చెయ్యాలి అన్నది మళ్ళీ ఇంకో పెద్ద పరిష్కరించవలసిన సమస్య.

      Delete
    3. neehaarikaa,
      నీహారిక గారూ,
      నిజమే,విడాకులకు సంబంధించి మీ విశ్లేషనే బాగుంది!యేదయినా అనుభవించేవారికే తెలుస్తుందంటారు,అందుకేనేమో!

      తమాషా చూశారా మధ్యయుగాల నాటి చాణక్యుదు విడాకుల ప్రపోజల్ స్త్రీ వైపు నుంచి వస్తే వెంటనే ఇచ్చెయ్యమన్నాడు - మనం నిజంగా ముందుకే వెళ్తున్నామా?

      Delete

* మీ వ్యాఖ్యలు తెలుగులోనే వ్రాయండి
* పోస్టుతో సంబంధంలేని, సంయమనం లేని, ఎవరికీ ఉపయోగం కాని వ్యాఖ్యలు వద్దు.
* నింద వేరు - విమర్శ వేరు, ఎవర్నీ గాయపరచకుండానే విమర్శించవచ్చు.
* పుల్లవిరుపుగా తీసిపారేయటం వల్ల అసహనం ఉపశమిస్తుందేమో, ఒరిగేదేమీ లేదు.
* ఏదైనా నచ్చకపోతే ఎందుకు నచ్చలేదో కాస్త సున్నితంగా, విశదంగా చెప్పండి. .
* అనవసర వ్యాఖ్యలు తొలగించబడతాయి.
* తెలుగులో వ్రాయటానికి ఈ బాక్సులో ఇంగ్లీష్‌లో టైప్ చేయండి.
* మద్యలో ఇంగ్లీష్ పదాలు టైప్ చేయాలనుకుంటే CTRL+G నొక్కండి.
* మరల తెలుగుకోసం కూడా CTRL+G ఉపయోగపడుతుంది.
* తెలుగులో వచ్చిన మేటర్ ని కాపీ చేసి క్రింద కామెంట్ బాక్స్ లో ఉంచడం ద్వారా మీ కామెంట్ పబ్లిష్ అవుతుంది.

అధ్యయనం అవినీతి ఆదూరి హైమవతి ఆధ్యాత్మికం ఆరోగ్యం ఆర్ధికం ఇంటర్వ్యూ ఎన్నికలు కత్తెరింపులు కథ కరంట్ అఫైర్స్ కవిత కార్యక్రమాలు కుటుంబం కులం చట్టం-న్యాయం చట్టసభలు చరిత్ర చర్చావేదిక చేయెత్తి జై కొట్టు తెలుగోడా! జనవిజయం జై గొట్టిముక్కల తెలంగాణ తెలంగాణా పునర్నిర్మాణం తెలుగు భాష తెలుగు-వెలుగు తెలుగుజాతి మనది నమ్మకాలు-నిజాలు నరసింహారావు మద్దిగుంట నవ్వుతూ బ్రతకాలిరా నా ప్రయాణం నా బ్లాగు అనుభవాలు నాకు నచ్చిన పాట నేను చదివిన పుస్తకం నేర ప్రపంచం నేరాలు-ఘోరాలు పత్రికా స్వేచ్చ పరిపాలన పరిశోధనలు పర్యావరణం పల్లా కొండల రావు పల్లె ప్రపంచం పల్లె సమస్యలు పల్లెప్రపంచం పిల్లల పెంపకం పురస్కారాలు పోరాటం ప్రకృతి జీవన విధానం ప్రక్రుతి జీవన విధానం ప్రజ ప్రజ వ్యాసములు ప్రజా రవాణా ప్రభుత్వ పథకాలు ప్రముఖులు ప్రవీణ్ కుమార్ ప్రశ్న ఫన్నీ ఫోటోలు బాల్యం బుల్లితెర బ్లాగు ప్రపంచం భారతరత్న భారతీయం భారతీయ సంస్కృతి భావ ప్రకటన భావప్రకటన భాష భూగోళం మంచి అలవాట్లు మంచి పాటలు మతం మంతెన వీడియోలు మధుర గీతాలు మల్లంపల్లి స్వరాజ్య లక్ష్మి మహనీయులు మహిళ మానవ వనరులు మానవ సంబంధాలు మానవ హక్కులు మానవహక్కులు మార్కెటింగ్ మార్క్సిజం మీడియా మెదడుకు మేత మెరాజ్ ఫాతిమా మేగజైన్ మేగజైన్ ప్రమోషన్ యువత యోగా రమేష్ బండారు రాజకీయం రాజ్యాంగం రామకీర్తనలు రాష్ట్ర విభజన రిజర్వేషన్లు రేగింగ్ లింక్స్ వార్త-వ్యాఖ్య వార్తలు వి. శాంతి ప్రబోధ వికాసం విగ్రహాలు-ఆగ్రహాలు విజ్ఞానం విద్య విద్యా విధానం వినోదం వీడియోలు వృక్షో రక్షతి రక్షిత: వృద్ధాప్యం వెంకట రాజారావు.లక్కాకుల వెబ్ మీడియా వేమన పద్యాలు వ్యక్తిగతం వ్యక్తిత్వ వికాసం వ్యవసాయం శుభాకాంక్షలు శ్యామలరావు తాడిగడప సమాజం సంస్కృతి సహాయం సాహిత్యం సిద్ధాంతం సినిమా సూరానేని హరిబాబు సేకరణలు సైన్స్ స్పూర్తి హ్యూమనిజం
 
Top